Лондоны Металлын биржид зэсийн үнэ өнгөрсөн Лхагва гаригт 9522.50 ам.доллар болон өсч, 2011 оноос хойш дээд түвшинд хүрчээ. Пүрэв гаригийн өглөөний байдлаар 9600 ам.долларт хүрээд байсан зэсийн ханш өдөртөө ялимгүй буурч, 9512 ам.доллартай тэнцсэн талаар “Profinance” уламжлав.

Зэсийн үнийн өсөлтөд дэлхийн болон БНХАУ-ын эдийн засгийн сэргэлт нөлөөлж буйг шинжээчид онцолж байна. Мөн АНУ-ын Төв банкны тэргүүн Жером Пауэлл эдийн засгаа дэмжихээр хэрэгжүүлж буй бодлогоо зогсоохгүйгээ мэдэгдсэн нь зэсийн үнийн өсөлтөд нөлөөлжээ.

Хятадын зэсийн салбарт дотоодын хөрөнгө оруулагчид ихээхэн хэмжээний хөрөнгө оруулалт хийж байгаа аж. Шанхайн фьючерсийн биржид зэсийн фьючерс үнэ сүүлийн есөн жилийн дээд түвшинд хүрчээ. Зэсийн үнэ өнгөрсөн оны гуравдугаар сард доод түвшинд хүрснээс хойш хоёр дахин өсөв.

Б.ЖАРГАЛ