Италийн Женуа хотын ойролцоох тосгоны оршуулгын газарт өчигдөр (2021.2.23) хөрсний нуранги үүсч, алдартай жуулчны баазын дэргэд хэдэн зуун шарил ил гарч, зарим нь далайд алдагджээ.

Шарилууд тосгоны умард хэсгийн далайн эргийн хавцлаас ойролцоогоор 50м доош унасан бөгөөд ихэнх авс нь чулуун дээр унаснаас болж хагарч эвдэрсэн байна. Хөрсний нурангид туугдан ил гарсан, хавцлаас унасан, далайд алдагдсан шарилуудыг “аврахаар” Камогли тосгоны гал сөнөөгч, аврагч нар шаргуу ажиллаж байгаа аж.

Одоогийн байдлаар далайд унасан 200 гаруй шарилаас цөөхнийг нь бүрэн бүтэн гаргаж авчээ. Нутгийн хэвлэл мэдээллийн хэрэгслүүдээр далайд унасан, хагарч, гэмтсэн шарилуудын зураг шуугиан тарьж байгаа аж.

Ийнхүү хөрсний нуранги болсон нь сүүлийн үед тус нутгийг дайран өнгөрсөн хэд хэдэн хүчтэй шуурганаас үүдсэн хэмээн мэргэжлийнхэн таамаглажээ. Гэвч түүнээс гадна нутгийн прокурорууд оршуулгын газрын ойролцоо барьж байсан барилгынхныг шалгаж эхэлсэн байна. Учир нь зарим эх сурвалжууд барилга барих үйл явц хөрс нурахад тодорхой хэмжээгээр нөлөөлсөн хэмээн үзжээ.

Эрх баригчдын зүгээс бүрэн бүтэн гаргаж авсан шарилуудад ДНХ-ийн шинжилгээ хийн, хэн гэдгийг нь тогтоох бөгөөд болсон явдлаас үүдэн ойр дотны хүмүүсийнхээ шарилыг алдсан гэр бүлүүдэд тусламж олгохоо амлажээ.

Эх сурвалж: TELEGRAPH