Цагаан ордны гадна 500 зул асааж, Ерөнхийлөгч Жо Байден Covid-19-өөр нас барсан 500 мянган хүний дурсгалыг хүндэтгэн, нэг минут чимээгүй зогссон байна. Тэрбээр үг хэлэхдээ “Өнөөдөр хагас сая /500071/ хүний төлөө гүнээ харуусан гашуудаж байна. Цар тахлын улмаас Дэлхийн I, II дайн болон Вьетнамын дайнд амь үрэгдэгсдээс ч олон америк хүн амиа алдлаа. Энэ нь дэлхийн бусад үндэстнээс илүү олон америк хүн вирусээр өвчилж, хорвоогоос буцсан үзүүлэлт юм. Бид нэг хүн мэт нэгдэж байж цар тахалтай тэмцэн, вирусийг ялан дийлнэ” гэжээ.

АНУ-ын тэргүүн хатагтай Жил Байден, Дэд Ерөнхийлөгч Камала Харрис, нөхөр Дуглас Эмхоф нар мөн талийгаачдын дурсгалыг хүндэтгэн, нэг минут чимээгүй зогссон байна. Энэхүү арга хэмжээний үеэр Цагаан ордон дээрх АНУ-ын төрийн далбааг хагас бөхийлгөжээ. Төрийн далбааг Баасан гаригийн орой хүртэл ийнхүү бөхийлгөх юм байна.

Америкийн төрийн тэргүүн хайртай дотны хүмүүсээ алдсан америкчуудад гүн эмгэнэл илэрхийлжээ. Байдены хүү Бо 2015 онд тархины хорт хавдраар, харин түүний эхнэр, хүүхэд 1972 онд автомашины ослоор нас барсан аж.

Жон Хопкинсын их сургуулиас өнгөрсөн Даваа гаригт “АНУ-д Covid-19-өөр нас барсан хүний тоо 500 мянга давлаа” гэж мэдээлжээ. Хамгийн сүүлийн мэдээллээр, тус улсад нийт 28174133 хүн Covid-19-өөр өвчилсөн бол нас барагсдын тоо 500071-д хүрсэн байна. Тус их сургуулиас дээрх тооцооллыг холбооны болон орон нутгийн эрх баригчдын мэдээллийг үндэслэн гаргажээ.

Эх сурвалж: USA TODAY