ОХУ-ын зэвсэг үйлдвэрлэгч Калашников АК-203 бууг энэ жилээс эхлэн Энэтхэгт үйлдвэрлэхээр болсон бөгөөд илүү олон хүн татахын тулд шинээр бүтээсэн өндөр технологи бүхий дробовик буугаа танилцуулж байгаа талаар гүйцэтгэх захирал Дмитри Тарасов мэдээлжээ. Дэлхийн олон оронд одоо ч зэвсэглэлдээ өргөн хэрэглэж буй АК-47 бууны зохион бүтээгчийн нэрээр овоглосон Калашников компани 2014 онд АНУ болон Европын холбоонд хориг тавиулснаасаа хойш бизнесийн шинэ талбар эрчимтэй хайсаар байгаа билээ.

Тарасовын хэлснээр компани 2025 он гэхэд ашгаа 60 хувь сайжруулж, 50 тэрбум рубль болгох төлөвлөгөөтэй ажиллаж байгаа аж.

Шинээр танилцуулж буй өндөр технологи бүхий дробовик бууны нэрийг Ултима гэх бөгөөд утасгүй интернет, bluetooth ашиглан ухаалаг утастай холбогдох чадвартай аж. Тус технологийг зэвсэг болон өндөр технологид хорхойтой залуу үеийнхэнд зориулан бүтээсэн аж.

Калашников компани Энэтхэгийн батлан хамгаалах яамтай хамтран дараагийн 10 жилийн хугацаанд нийт 670 мянган АК-203 бууг Энэтхэгт үйлдвэрлэхээр тохиролцсон байна. Өнгөрсөн жил Калашников АК-130 бууг үйлдвэрлэх зөвшөөрлийг Арменид өгсөн бөгөөд өдгөө 37 настай Тарасов цаашид Венесуэльтэй тогтоосон холбоогоо өргөжүүлж, Латин Америктай илүү нягт холбоотой ажиллах сонирхолтой байгаагаа илэрхийлж байсан юм.

Калашников үйлдвэр нийт 27 оронд зэвсэг нийлүүлдэг бөгөөд дотоодын галт зэвсгийн хэрэгцээний 95 хувийг хангадаг билээ. Гэвч 2014 оны хориг арга хэмжээнээс болж АНУ-ын компаниуд Калашниковтой хамтран ажиллах боломжгүй болсон юм. Шинээр гаргаж буй АК-203 буу нь хоёрдугаар дайны үед зохион бүтээгдсэн АК-47 бууны хэд дахин сайжруулан шинэчилсэн хувилбар аж. АК-47 бууг ЗХУ-ын цэрэг Михайл Калашников хоёрдугаар дайнд шархадсаныхаа дараа зохион бүтээж байсан юм.

Эх сурвалж: REUTERS