ОХУ-ын шүүх Кремлийг эсэргүүцэгч, сөрөг хүчний төлөөлөгч Анастасия Шевченког хууль бус бүлэглэлийн нэрийн өмнөөс үйл ажиллагаа явуулж байсан хэмээн буруутган хуралдаж, өчигдөр/2021.2.18/ дөрвөн жилийн хорих ялыг нь түдгэлзүүлжээ. Шүүхийн тогтоолоор хоёр хүүхдийн эх, 41 настай Шевченко 2019 оноос хойш сууж буй гэрийн хорионоосоо гарах эрхтэй болж буй юм. Түүнийг ийнхүү гэрийн хорионд оруулсан нь ОХУ-ын эрх баригчдын Шевченкогийн үйл ажиллагааг таслан зогсоох, дэмжигчдэд нь жишээ харуулах гэсэн улс төрийн зорилготой үйлдэл байсан хэмээн зарим хүмүүс үзжээ.

Улсын яллагчид Шевченкод таван жилийн хорих ял оноохыг хүссэн ч шүүхийн тогтоол ийнхүү өөрөөр гарсан байна. Шүүх хурлаас Шевченко хүүгээ тэврэн гарч ирэхэд нь түүний дэмжигчид баяр хүргэн угтжээ.

Эрх баригчид Шевченког цөллөгт явсан, газрын тосны магнат асан Михайл Ходоровскийн байгуулсан Их Британид төвтэй “Нээлттэй Орос” бүлгэмийн нэрийн өмнөөс үйл ажиллагаа явуулж байсан хэмээн буруутгасан юм. ОХУ 2015 онд шинэ хуулиараа дээрх “Нээлттэй Орос” тэргүүтэй гучин бүлгэмийг зохисгүй хэмээн үзэж, үйл ажиллагаа явуулахыг нь хориглосон билээ.

Гэвч дэмжигчдийнх нь хэлж байгаагаар Шевченко улс төрийн семинар, сөрөг хүчний жагсаалд оролцсон зэрэг нь хууль зөрчсөн хэрэг биш гэнэ.

Эх сурвалж: REUTERS