Монголд аялж яваад бусдад хорлогдсон англи шүхэрчин нас барахаасаа өмнө эхнэртээ “Монгол Манчестераас ч илүү аюулгүй газар” хэмээн хэлж байжээ.

Болсон явдлыг эргэн сөхвөл, 53 настай Стив Наш 2016 онд Хангайн нуруунд аялж яваад хүнд дээрэмдүүлж, хутганы шархаа даалгүй амьсгал хураасан. Түүний хэргийн талаарх шүүх хурал Уаррингтон Коронерийн шүүх танхимд өчигдөр болсон юм. Шүүх хуралд Нашийн эхнэр Ширлей оролцож, түүнийг аялалд явахаасаа өмнө “Монгол бол хамгийн сайхан сэтгэлтэй, найрсаг, нөхөрсөг хүмүүстэй орон” хэмээсэн бөгөөд очсоныхоо дараа “Би энд эх орондоо байгаагаас аюулгүй явж байна” хэмээн хэлж байсныг дурсчээ.

Түүний үхэлд 2017 онд Б.Г гэгчийг гэм буруутай хэмээн үзэж, Монгол Улсын хуулиар хамгийн хүнд буюу 16 жилийн хорих ял оноосон аж.

Стив Нашийн цогцсыг Хандаргат давааны Хөөт гэх газраас олсон юм. Түүний үхлийн шалтгааныг хоёр удаа хутгалуулснаас үүдсэн цочрол, цус алдалт хэмээн урьдчилсан байдлаар тогтоосон байна.

Талийгаач Монгол орныг тойрон 10 хоногийн турш шүхэртэй аялахаар найз Гарет Астонтой хамт Монголд ирсэн ч найз нь бэртсэн учир аяллаа цааш ганцаар үргэлжлүүлэхээс өөр аргагүй болжээ. Гэвч удалгүй эхнэр нь Нашийн байршил тогтоогч хөдөлгөөнгүй болсныг анзаарч, Астонтой холбоо барьсан байна.

Нашийн эхнэр Ширлей "Стив маань бурхан болсноос хойш манай гэр бүл сүйрчихлээ. Би түүнгүйгээр маш их ганцаардаж, амьдрал утгагүй мэт санагдаж байна. Тэр амьдралд их хайртай хүн байсан. Түүнд цаашид хийж бүтээх зүйл маш их байсан. Тэр алуурчин нөхрийг минь, бас намайг алчихлаа. Түүнийг минь юу ч буцааж авчирч чадахгүй ч гэсэн түүнийг хөнөөсөн алуурчин шударга ёс гэж юу байдгийг биеэр үзэх ёстой" хэмээн ярьжээ.

Наштай хамт аялалд гарсан Астоны хэлснээр тэрбээр бэртсэн өдрөө нутгийн айлын утсаар холбоо барьж маргааш нь эмнэлэгт хүргэж өгөх хүн дуудсан аж. Гэтэл Астоныг эмнэлэгт хүргэгдсэний дараа Нашийн байршил тогтоогч удтал нэг байрнаасаа хөдлөөгүй тул тэрбээр цагдаад ханджээ.

Эх сурвалж: BBC