Вакцинжуулалтын бэлтгэл ажлыг хангах ажлын хүрээнд Шадар сайд, Улсын онцгой комиссын дарга С.Амарсайхан, Эрүүл мэндийн сайд С.Энхболдын хамт өнөөдөр (2021.02.13) Халдварт өвчин судлалын үндэсний төв (ХӨСҮТ)-д ажиллав.

Энэ үеэр эхний ээлжинд орж ирэх вакцины хадгалалт, тээвэрлэлт, нөөцлөлтийг хэрхэн зохион байгуулах талаар эмнэлгийн удирдлагууд дэлгэрэнгүй мэдээлэл өглөө. Вакцин хадгалах нөөцлөх гурван төрлийн хөргүүр, зөөврийн сав, хүйтэн хайрцаг, стандартын шаардлага хангасан тээвэрлэх машин ХӨСҮТ-д бэлэн байна. Вакцинжуулалттай холбогдуулан аймаг, сум, дүүргийн өрхийн Эрүүл мэндийн төвийн 300 гаруй эмнэлгийн албан хаагчдыг сургалтад хамруулж бэлтгэжээ.

Дархлаажуулалтыг эхлэхээс өмнөх зохион байгуулалт, эрүүл мэндийн ажилтнуудыг бүрэн сургах, илүү цагаар ажилласан цалинг нэмэгдүүлэх, дархлаажуулалтын дараа гарч болох хариу урвалыг хянах, учирч болох эрсдэлийг тооцсон бүх бэлтгэлийг өндөр түвшинд хангасан байх шаардлагатайг Шадар сайд анхааруулсан юм. Салбар хоорондын уялдаа холбоог сайжруулж, ариутгал халдваргүйжүүлэлтийг эрчимжүүлэх, вакцины хадгалалт, нөөцлөлт, тээвэрлэлтэд анхаарч ажиллах чиглэлийг Эрүүл мэндийн сайдад өгөв.

Сануулахад, Ерөнхий сайд Л.Оюун-Эрдэнэ "Нийслэлийн хэмжээнд 420 мянган иргэнийг шинжилгээнд хамруулсны дараа вакцинжуулалт хийнэ" хэмээн мэдэгдсэн. Эрүүл мэндийн яамнаас мөн нэгдүгээр улиралд багтаан хамгийн эрсдэлтэй бүлгээс вакцинжуулалтыг эхлүүлэхээр бэлтгэл хангаж буйгаа онцолсон удаатай. Эрсдэлтэй бүлэг гэдэгт халдварын голомтот бүсэд ажиллаж байгаа эмч, мэргэжилтнүүд, эрүүл мэндийн салбарынхан, мөн халдвар хамгааллын дэглэмийг мөрдүүлж буй Мэргэжлийн хяналтын байцаагчид, Зоонозын өвчин судлалын үндэсний төвийн ажилтан, албан хаагчид, цагдаа, онцгой, мөн ахмад настан зэрэг бүлэг хамаарч байгаа юм.