Уншигч түмнийг нэгэн үеэр нь байлдан дагуулсан аймшгийн зохиолын хаан гэгддэг зохиолч Стефен Кинг өдгөө өөрсдийн номоо бичиж, хэвлүүлэхийг мөрөөддөг хүүхэд залуусыг дэмжихээр болжээ.

Ном бичнэ гэдэг тун амаргүй ажил бөгөөд бичсэн хойноо хэвлүүлнэ гэдэг бүр ч төвөгтэй асуудал юм. Харин Стефен Кинг өөрийн биеэр үзэж туулсан тэрхүү бэрхшээлийг залуу зохиолчдын мөрөн дээрээс хөнгөлөхийг хүсч, сургуулийн сурагч хүүхдүүдэд анхны номынх нь хэвлэлийн зардлыг хандивлахаа амласан байна.

Тухайлбал тэрбээр Фарвелл бага сургуульд 6500 ам.доллархандивласан бөгөөд тэр мөнгөөр хоёр ч ном хэвлүүлэхэд хангалттай хэмээн үзэж байгаагаа хэлжээ.

Хэдий хүүхдүүдийн бичсэн зохиол Кингийнх шиг мэргэжлийн түвшинд хүрч очихгүй ч маш сонирхолтой байх болно хэмээн Фарвелл бага сургуулийн эрхлэгч Аманда Винслоу ярьжээ. Кингийн өгсөн мөнгөөр тус сургуулийн зохиолч судлах хөтөлбөрт хамрагдсан, хүүхдүүдийн багаараа бичсэн хоёр боть зохиолыг ном болгон хэвлэх аж.

Хэдийгээр хөтөлбөрт хамрагдсан зарим хүүхдүүд дунд ангид дэвшин Фарвелл бага сургуулийг орхисон ч дөрвөн жилийн хөтөлбөрийн хугацаанд олон дүр хөгжүүлж, үйл явдлыг нь баяжуулахад их хувь нэмэр оруулжээ.

Эх сурвалж: UNILAD