Зэвсэгт хүчнийхэн мөрдөс нэгт нөхөртөө туслахыг уриалав

Зэвсэгт хүчний салбарынхан мөрдөс нэгт нөхөртөө амьдрах итгэл найдвар хайрлан, чин сэтгэлээсээ туслахыг уриалжээ. Тус уриалгад “Хэлж ирдэггүй хийсэж ирдэг аюулт өвчин мөрдэс нэгт бидний нөхрийг дайрчээ.

Хошууч Б.Эрдэнэбаяр нь 1987 онд Дорноговь аймгийн Мандах суманд төрсөн. Дорноговь аймгийн 1 дүгээр 10 жилийн сургуулийг 2005 онд, БХИС-ийг 2010 онд тус тус төгсөж ажлын анхны гараагаа Зэвсэгт хүчний 120 дугаар ангиас эхэлсэн юм. Тус ангид салааны захирагчаар 2010-2012, Зэвсэгт хүчний 327 дугаар ангид 2012 оноос хойш одоог хүртэл зэвсгийн албаны инженерээр ажиллаж байна.

Тэрбээр 2011 онд Исламын Бүгд Найрамдах Афганистан Улсад амжилттай үүрэг гүйцэтгэсэн энхийг сахиулагч.

2017 онд Энхийг дэмжих ажиллагаанд үүрэг гүйцэтгэх зорилго тавин эмчийн үзлэгт хамрагдсан бөгөөд тус үзлэгээр “Цагаан эсийн өөрчлөлттэй” гэж оношлогджээ. Улмаар БНХАУ-ын Бээжин хотын Хэбэй мужийн Яанда эмнэлэгт онош тодруулахаар шинжилгээ өгөхөд СМL буюу Миелоид эсийн гаралтай цагаан эсийн архаг хавдар гэж оношлогдсон байна. Энэ хугацаанд УНТЭ-ийн цусны эмчийн хяналтад монохими эмчилгээ хийлгэж байсан боловч 2020 оны 6 дугаар сараас биеийн байдал хүндэрч эмчилгээ болон эмэндээ өвчин нь дарагдахаа больж эхэлжээ.

2020 оны есдүгээр сард хавдар нь сэдэрч AML буюу цагаан эсийн хурц хавдар луу шилжиж УНТЭ-ийн цусны тасагт 2 удаагийн химийн эмчилгээ хийлгэсэн боловч дахин сэдэрч Монголд эмчлэгдэх боломжгүй, яаралтай чөмөг шилжүүлэн суулгах шаардлагатай болсон.

Хэд хэдэн орны эмнэлэгт хүсэлт гаргасны дагуу Турк Улсын МЕМОРИАЛ эмнэлгээс эмчлэх боломжтой, эмчилгээний зардалд 300 сая төгрөг шаардлагатай гэсэн хариуг ирүүлжээ.

Мөрдэс нэгт нөхөртөө амьдрах итгэл хайрлаж, амьдралын түшиг ханьд нь, алаг бяцхан үрсэд нь сэтгэлийн илчээ түгээхийг та бүхнээсээ хичээнгүйлэн хүсье. Сайхан сэтгэлийн үзүүрт шар тос гэдэг дээ" гэжээ.