Ерөнхий сайд асан Ч.Сайханбилэг өнөөдөр /2021.02.02/ өөрийн цахим хуудсаараа Ерөнхийлөгч Х.Баттулгад хандаж мэдэгдэл хийлээ. Түүний хэлсэн үгийг бүрэн эхээр нь хүргэж байна.

Тэрбээр "Өөрийн чинь өмгөөлөгч таны хэргийг чамбайлахад хэцүү биш ээ. Гэхдээ та улс төрийн нөлөө, оролцоог нь хаагаад өгч чадах уу. Тэгэхгүй бол хуулийн сайн үндэслэл гаргаад ч хий хоосон ажил гэдгийг сонсоод үнэхээр сэтгэл гонсоймоор. Хуульд захирагдах шүүгч, прокурорыг томилохдоо Ерөнхийлөгч өөртөө захирагд гэж дарамтлаад, үгүй бол огцрох өргөдлөө огноогүй бичиж өгөхийг шаарддаг гэж Ерөнхий сайд нь ажлаа өгөхдөө мэдэгдсэнийг бодохоор үнэхээр сэтгэл өвдмөөр. Хууль зүйн сайд нь Ерөнхийлөгч албан өрөөндөө шүүгч нарыг дуудаж хэнд хэдэн жилийн ял өгөхийг шийддэг гэдгийг илчилснийг хараад үнэхээр уур хүрмээр.

Чамайг төрийн нэр ашиглан баривчилж, шоронд хатааж, тэнд ална гэсэн заналхийллээ байж болох бүх сувгаар надад хүрэхээр оролдож байгаа Ерөнхийлөгчтэй гэж бодохоор үнэхээр дургүй, зэвүү зэрэг хүрмээр. Энэ бүхэн Солонгос савангийн дуурийн  эсвэл Холливуд киноны дүрүүд биш ээ. Манай улсын бодит төрх. Өнөөдрийн дүр төрх. Холбогдох хэд хэдэн хуулиас гадна Үндсэн хууль зөрчсөн Ерөнхийлөгчийн энэ үйлдлүүд сошиалаар гуравхан хоногийн сэвэлт болж мартагдах учиртай гэж үү.

Энэ Ерөнхийлөгч “Монгол ялна” гэдэг боловч Монголоо ялагдуулаад дууслаа. Өөрөө 800 км-т төмөр зам тавьж байгаа гэж хэлдэг ч, 267хан км явж хил дээр хүрэх төмөр зам өнөөдөр дуусаагүй байна. Өөр чиглэлд барьсаар байна. Хятадад нүүрс нийлүүлэх Австралийн орон зайг Орос нөхөж, харин Монгол ялагдлаа. Гуравдагч хөршийн хөрөнгө оруулагч дээр түшиглэсэн Оюутолгой төслийг хөдөлгөсөн хүмүүсийг бүгдийг нь шоронд хийсэн.

Өнөөдөр УИХ, Засгийн газрын урдуур шургалж, энэ төслийн ажлын хэсгийг хэзээ ч асуудал шийдүүлэхгүй бүтэлгүй попуудаар дүүргэх гэж байна. Цаад зорилго нь ердөө л гуравдагч хөршийн хөрөнгө оруулалтыг хөөж гаргах, хоёр хөршид уг төслийг барьж өгөх, Монголыг дахин ялагдуулах юм.

Түүний бүрэн эрхийн дөрвөн жилийн хугацаанд хүмүүсийн амьжиргааны түвшин улам буурлаа. Эдийн засгийн өсөлт зогслоо. Хувийн хэвшлүүд үүд хаалгаа барилаа. Том компаниудыг өөртөө үнэнч эсэхээр нь хоёр хуваалаа. МАНАН, 30 гэр бүл, оффшор гэсэн хуйвалдааныг бий болголоо. Гэхдээ өөрөө жинхэнэ МАНАН-г байгуулж, оффшорын жинхэнэ эзнээр өөр хүмүүс бус өөрөө тодорлоо. Бүтээн байгуулалтын жинхэнэ ажлуудыг бус бүтэлгүй үзэл суртлын дайн өрнүүлж, монголчуудыг талцуулж, нийгмээ хагалан бутаргалаа.

Манай улс сүүлийн 30 гаруй жилийн хугацаанд “Төв Ази дахь ардчиллын цорын ганц баянбүрд” хэмээн нэрлэгдэж ирсэн. Ардчилал, чөлөөт зах зээл, хүний эрх, хуульд захирагдах ёс, хараат бус шүүх засаглалаа өдөр бүр арчиж, тордож суухгүй бол нүд ирмэхийн зуур алдах боломжтойг, дарангуйлал руу гулсах боломжтойг, ардчиллын баянбүрд асар хурдан цөлжих боломжтойг бид мэдэрлээ.

Бид энэ бүхнийг хараад гар хумхин сууж болохгүй. Энэ хэвээрээ үргэлжилбэл сайнаар бол нэг нэг намын тогтолцоо бий болно. Саараар бол нэг хүн диктатур тогтоно. Болоод өнгөрсөн үйл явдлыг дахин гаргуулахгүй байх зорилгоор хууль дээдлэх ёсыг тогтоож, хараат бус шүүх засаглалыг бий болгох зорилгоор олон улсын Amsterdam and Partners хуулийн товчоотой хамтран өөрийн цагаан номоо гаргаж байна. Saihanbileg.com цахим хуудсаар дамжуулан монгол, англи хэл дээр унших боломжтой" гэлээ.