Дэлхий дахинд covid-19-ийн халдварын шинэ тохиолдлын тоо гурван долоо хоног дараалан буурч байна гэж Дэлхийн эрүүл мэндийн байгууллагын ерөнхий захирал Тедрос Аданом Гебрейесус Даваа гаригт /2021.02.01/ болсон ээлжит хэвлэлийн хурлын үеэр мэдэгджээ.

Тэрбээр энэ тухай “Covid-19 өвчин хувьсан өөрчлөгдөж байгаа ч цар тахлыг хянаж болно гэсэн найдвар төрж байна. Хүн бүр амны хаалт зүүх, зай барих зэрэг халдвар хамгааллын дэглэмээ сайтар баримталснаар халдварын тархалтыг зогсоож болно гэдгийг бид харж байна. Гэхдээ бид тайвшрах болоогүй байгаа. Мөн дэлхий нийтээрээ эрүүл мэндийн салбар дахь мэдээ мэдээллийн системийг сайжруулах нь маш чухал байна. Дэлхийн хэмжээнд covid-19 халдвараас үүдэлтэй 10 нас баралт тутмын дөрөв нь бүртгэлгүй үлдэж байна" хэмээн ярьжээ.

Сүүлийн 24 цагийн хугацаанд дэлхий дахинд нийт 444 мянга гаруй халдварын шинэ тохиолдол бүртгэгдсэн бөгөөд нийт халдвар авсан хүний тоо 102.58 сая болжээ. Мөн нэг хоногт covid-19-ийн улмаас 10 мянга гаруй хүн нас барж, нийт 2.22 саяыг даваад байна.

Эх сурвалж: Voice of America