Норвегийн энэ жилийн энх тайвны салбарын Нобелийн шагналд ОХУ-ын сөрөг хүчний төлөөлөгч Алексей Навальный, ДЭМБ, цаг уурын өөрчлөлтийн эсрэг идэвхтэн Грета Тунберг нарыг нэр дэвшүүлжээ.

Нобелийн шагналд зөвхөн Нобелийн шагналын зөвлөлөөс гадна мянга мянган хүмүүс нэр дэвшигч санал болгож болдог бөгөөд үүнд Норвегийн хууль тогтоогчид 2014 оноос хойш жил бүр идэвхтэй оролцсоор ирсэн юм. Эцэст нь хэнд шагнал гардуулахыг Норвегийн Нобелийн шагналын зөвлөл шийддэг. Нэр дэвшигчдэд санал, шүүмж хэлдэггүй, шагнал аваагүй нэр дэвшигчдийн болон нэр дэвшүүлэгчдийн нэрийг нууцалдаг уламжлалтай аж. Гэвч тухайн хүний нэрийг дэвшүүлсэн хүн нь өөрөө нэр дэвшигчийн талаар ярих эрх нээлттэй байдаг юм.

Эх сурвалжуудын мэдээлж байгаагаар дэлхий нийтэд, ялангуяа буурай орнуудад вакцин хүрэлцээтэй байлгах асуудалд анхааран ажиллаж байгаагийнх нь төлөө ДЭМБ-ыг, дэлхийн хамгийн тулгамдсан асуудлуудын нэг буюу цаг уурын өөрчлөлтийн эсрэг дуу хоолойгоо өргөж, дэлхийн удирдагчдыг уриалан, залуу үеэ манлайлан тэмцэж байгаагийнх нь төлөө Грета Тунбергийг, энх тайван, ардчилсан Орос орныг бүтээхээр өөрийгөө үл тоон ажиллаж байгаагийнх нь төлөө Алексей Навальныйг Нобелийн шагналд Норвегийн сайд асан Ола Элвестуэн нэр дэвшүүлсэн байна.

Тэднээс гадна Беларусийн идэвхтэн Свиатлана Цихоновская, Мариа Колесникова, Вероника Цепкало нарыг шударга сонгууль, энх тайван байдлын төлөө хичээл зүтгэл гаргасных нь төлөө нэр дэвшүүлсэн аж. Тэр ч байтугай зарим хүмүүс Дональд Трамп, НАТО, НҮБ-ын цагаачын албыг энх тайвны шагнал хүртэх эрхтэй хэмээн үзэж, нэр дэвшүүлжээ.

Эх сурвалж: REUTERS