Найруулагч Б.Отгонзоригийн бүтээл “The Woman" уран сайхны кино Бангладеш улсын Дака хотноо болсон олон улсын кино наадмаас дахин нэг шагнал хүртжээ. Уг наадмын Азийн шилдэг кино булангийн уралдаант хэсэгт өрсөлдөж, "Шилдэг зураглаач" шагналын эзэн болсныг уран бүтээлчид дуулгалаа.

“Дака” олон улсын наадам нэгдүгээр сарын 16-наас 24-ний өдрүүдэд кино театр болон цахимаар кинонуудаа гаргаж, шагналын эздээ тодруулсан байна. Азийн шилдэг кино төрөлд 350 гаруй бүтээл ирсэнээс 22 нь шалгарч, шилдэг зургаан кино шагналын төлөө өрсөлджээ.

Солонгосын нэртэй жүжигчин Ан Жи Мүнийн тоглосон "Choi Hainzan" фильм продакшны анхны уран бүтээл өнгөрсөн 2020 оны зун онлайнаар нээлтээ хийсэн.

"The Woman" уран сайхны кино хамгийн сүүлд 2020 оны аравдугаар сард дөрвөн номинацид нэр дэвшиж,  “Шилдэг эмэгтэй дүр” шагналыг Ч.Ундрал,  “Шилдэг туслах дүр”-ийн шагналыг Гавьяат жүжигчин Т.Борхүү хүртсэн юм.

А.СҮРЭН