Арабын Нэгдсэн Эмират улсын нийслэл Дубай хотноо эдгээр өдрүүдэд зохион байгуулагдаж буй PUBG Mobile дэлхийн аваргад оролцож буй Монголын Zeus 16 багийг тэргүүлж эхэллээ. Эхний өдрийг 14-р байрт өндөрлүүлж, тэмцээний хоёр дахь өдөр наймдугаар байр руу ахисан Zeus багийнхан өчигдөр /2021.01.25/ тэмцээний гурав дахь өдөр 21-р тойргийн дараах байдлаар 227 оноотой болж, Хятадын 4АМ багийн хамтаар хүснэгтийг тэргүүлж эхлэв. Хэрэв өнөөдөр явагдах найман тойргийн дараах байдлаар хүснэгтийн байраа хадгалж чадвал Zeus багт дэлхийн аварга болох боломж байна.

Энэхүү тэмцээний нийт шагналын сан нь 1.2 сая ам.доллар бөгөөд түрүүлсэн баг 700 мянган ам.доллар, хоёрдугаар байр 200 мянган ам.доллар, гуравдугаар байр 100 мянган ам.доллар ,дөрөвдүгээр байр 40 мянган ам.доллар тус тус хүртэнэ.

Zeus баг тэмцээний гурав дахь өдөр тун жигд тоглолтыг үзүүлсэн бөгөөд энэ өдөр тэмцээнийхээ анхны “Chicken Chicken Winner Dinner”-ийг хүртсэн юм. Мөн PUBG Mobile дэлхийн аваргын гурав дахь өдрийн MVP-ээр Zeus багийн Zyoll буюу Б.Золбоот тодорсон юм.

ZEUS Esports багийн үндсэн бүрэлдэхүүнд О.Бат-Оргил, С.Ундрах, Б.Золбоот, Н.Дулаанжаргал, Б.Тэнгис, Б.Билгүүн нар багтдаг.