ЭМЯ: Нийслэлд 41 халдвар илэрсний 16 нь Ачтан эмнэлгийн хавьтлууд

"АЧТАН ЭМНЭЛГИЙН ХАВЬТЛУУДААС 16, ТЭНҮҮН-ОГООГИЙН ТАВАН ЖОЛООЧООС ХАЛДВАР ИЛЭРЛЭЭ"

Эрүүл мэндийн яам Covid-19-ийн нөхцөл байдлын талаарх өнөөдрийн /2021.01.06/ мэдээлэл хийж байна. “Өчигдөр 16377 хүнд covid-19-ийн халдварын шинжилгээ хийжээ. Үүнээс 41 хүнд халдвар илэрсэн байна. Шинэ тохиолдол бүгд Улаанбаатар хотод бүртгэгдсэн бөгөөд тав нь ХӨСҮТ-ийн эрүүл мэндийн ажилтан бол үлдсэн нь голомтлон гарсан бусад хавьтлын ойрын хүмүүсээс халдвар илэрчээ.

Нэгдүгээр сарын 4-нд “Ачтан” эмнэлэгт халдварын шинэ голомт бүртгэгдсэн. Тус эмнэлгийн есөн ажилчин халдвар авсан. Тэдний гэр бүлийн хүмүүсээс халдвар илэрснээр нийт тохиолдол 16 болов. “Ачтан” эмнэлэг орон тооны 124 ажилчинтай боловч сүүлийн өдрүүдэд 96 хүн ажиллаж байжээ. Тэдний есийг нь тусгаарлаж, 88 хүнийг ажиглан тусгаарлах байранд шилжүүлсэн байна. Бусад шинээр илэрсэн тохиолдлууд нь “Тэнүүн-Огоо” ХХК-ийн таван жолоочоос нэмж халдвар илэрчээ. Тэдний гурав нь тусгаарлалтад байжээ. Батлагдсан тохиолдлын гэр бүлийн хүн нь Үндэсний цэцэрлэгт хүрээлэнд ажилладаг байсан учраас тус байгууллагын ажилчдыг шинжилгээнд хамруулахад хоёр хүнээс халдвар илэрсэн. Мөн Баянзүрх дүүргийн нэгдсэн эмнэлгийн голомтоос гэр бүлийн болон тусгаарлалтад байсан бусад хавьтлуудаа шинээр нэмж халдвар илэрсэн” гэж ХӨСҮТ-ийн Тандалт, судалгааны төвийн дарга А.Амбасэлмаа хэллээ.

Ингэснээр Улаанбаатарт нийт батлагдсан тохиолдол 527 болов.

Улсын хэмжээнд халдварын голомтуудад нийтдээ 853 тохиолдол бүртгэгдсэн. Монгол Улсын хэмжээнд халдварын батлагдсан тохиолдол 1349 болсон бол үүнээс 887 хүн эдгэрсэн байна .Сүүлийн 24 цагт гурван хүн эдгэрсэн. Эмчлэгдэж байгаа нийт 451 хүний биеийн байдлыг үнэлбэл, маш хүнд 3, хүнд 13, хүндэвтэр 138, хөнгөн 297 хүн эмчлэгдэж байна.

ХӨСҮТ-д маш хүнд нэг, хүнд 6, хүндэвтэр 62, хөнгөн 138 хүн
Цэргийн төв эмнэлэгт 221 хүн эмчлүүлж байгаагаас маш хүнд хоёр, хүнд долоо, хүндэвтэр 76, хөнгөн 136
Сэлэнгэ аймагт 13 хүн эмчлүүлж байгаагаас бүгд биеийн байдал нь хөнгөн
Хан-Уул дүүргийн 300 ортой эмнэлэгт 10 хүн ажиглалт, тандалтад байна.

"АРВАНХОЁРДУГААР САРЫН 15-НААС ХОЙШ АЧТАН ЭМНЭЛГЭЭР ҮЙЛЧЛҮҮЛСЭН БОЛ ШИНЖИЛГЭЭНД ХАМРАГДААРАЙ"

Ачтан эмнэлгээр үйлчлүүлсэн иргэд халдварт өртсөн байх магадлал өндөр байгаа учраас 2020 оны арванхоёрдугаар сарын 15-наас хойш тухайн эмнэлгээр үйлчлүүлсэн иргэд харъяа цэгүүдэд шинжилгээнд хамрагдахыг хүслээ. Өнгөрөгч сарын 28-ноос хойш Ачтан эмнэлэгт 14 хүн хэвтэн эмчлүүлж байсан.

Сүүлийн 24 цагийн дотор Сэлэнгэ, Дархан-Уул, Говьсүмбэр, Орхон, Архангай, Дорноговь аймгийн голомтоос батлагдсан тохиолдол бүртгэгдээгүй.

Эрүүл мэндийн яамны ахлах шинжээч Д.НАРАНГЭРЭЛ:

-ЗӨСҮТ-ийн хариу арга хэмжээний баг өчигдөр 17 обьектын 11681 метр квадрат талбайд голомтын эцсийн халдваргүйтгэл хийлээ. Мөн тус төвийн явуулын авто лаборатори Өмнөговь аймгийн Гашуунсухайт боомтод ажиллаж, уртын тээврийн 49 жолоочид шинжилгээ хийхэд коронавирус илрээгүй. НЭМҮТ-өөс коронавируст халдварын идэвхтэй харуулдан тандалт хийж байгаа. Уг харуулдан тандалтаар эрсдэлт бүлгийн хүн амаас гадна нийтийн тээвэр, такси, банк, худалдаа үйлчилгээний байгууллагын ажилчдыг хамруулж байгаа. 24 цагийн хугацаанд 1194 хүнд үзлэг тандалт хийсэн. Хоёр өдөр нийтдээ 2000 гаруй хүнд коронавирусийн халдварын шинжилгээ хийхэд нэг хүнээс халдвар илэрсэн. Тусгай дугаарын долоон утсанд 24 цагийн хугацаанд 4,662 хүн холбогдож, зөвлөмж зөвлөгөө авсан.