Хатуу хөл хориог далимдуулан согтууруулах төрлийн ундаа зарж, ашиг олох гэсэн шагчид шатав бололтой. Учир нь Засгийн газар өнгөрсөн Даваа гаригт Улаанбаатар хотын хэмжээнд хатуу хөл хорио дахин тогтоох болсныг мэдэгдэнгүүт иргэд согтууруулах төрлийн ундааг бөөндөн, олноор авсан ч өчигдрөөс худалдан авсан дэлгүүртээ буцаах  хүсэлт тавьсан аж.

Нийслэлээс өчигдөр хатуу хөл хорионы үеэр хэрэгжих журмыг танилцуулах үеэрээ 17-оос доош градустай согтууруулах төрлийн ундааг худалдан борлуулахыг хориглохгүй болохоо мэдэгдсэн. Иймээс пиво, дарс зэргийг шаглан, ашиг олох боломж хомсдож байгаа юм.

Анх Засгийн газраас улсын хэмжээнд хатуу хөл хорио тогтоосны дараа градусаас нь үл хамаарч согтууруулах төрлийн бүх ундааг худалдан борлуулахыг түр хугацаагаар хориглосон. Энэ сиймхийг ашиглан шагчид архи, пиво зэргийг үйлдвэрийнх нь үнээс хэд дахин нугалан зарсан. Цагдаагийн байгууллагаас энэ төрлийн зөрчлийг таслан зогсоох зорилгоор цахим хуудсанд тавигдсан зарын дагуу шалгалт хийж, илэрсэн зөрчилд хэрэг нээн шалгасан ч зөрчил буураагүй. Харин ч өдрөөс өдөрт эрүүлжүүлэх байранд хоноглох иргэдийн тоо, согтуугаар тээврийн хэрэгсэл жолоодох зөрчил нэмэгдсэн юм.

Иймээс нийслэл согтууруулах ундаанд тавигдах журмыг зөөллөсөн нь шагчдыг мөнгө унагах боломжгүй болгов.

Г.ХОРОЛ