Ц.Элбэгдорж: Баян-Өлгийнхний бүтээсэн баялаг баруун бүсийн дотоодын нийт бүтээгдэхүүнд давамгайлж байна | News.MN

Ц.Элбэгдорж: Баян-Өлгийнхний бүтээсэн баялаг баруун бүсийн дотоодын нийт бүтээгдэхүүнд давамгайлж байна

Хуучирсан мэдээ: 2016.03.21-нд нийтлэгдсэн

Ц.Элбэгдорж: Баян-Өлгийнхний бүтээсэн баялаг баруун бүсийн дотоодын нийт бүтээгдэхүүнд давамгайлж байна

Жил бүрийн гуравдугаар сарын 22-нд Казах түмний ёслон тэмдэглэдэг Наурызын баярт зориулсан хүндэтгэлийн хурал өнөөдөр Баян-Өлгий аймгийн төв Өлгий суманд боллоо.

Уг хурлын үеэр Ерөнхийлөгчийн Хүний хөгжил, нийгмийн бодлогын зөвлөх Р.Болд Казах зонд илгээсэн Монгол Улсын Ерөнхийлөгчийн мэндчилгээг уншиж сонсгов. Төрийн тэргүүний мэндчилгээнд:

“Эрхэм хүндэт Баян-Өлгийчүүд ээ,

Монгол Улсын нийт Казах иргэд ээ,

Та бүхэнд эрт үеэс уламжлагдан ирсэн казах түмний ёс заншил, өв соёл, наран адил наашлах Наурыз баярын мэнд дэвшүүлж, аз жаргал, сайн сайхан бүхнийг хүсэн ерөөе.

Байгаль дэлхийн жамаар хуучин жил хулжиж, шинэ жил шилжин ирэх цаг мөчид Казах түмний уламжлалт баярын босгон дээр Та бүхэнтэйгээ мэндчилж байгаадаа Монгол Улсын Төрийн тэргүүн би сэтгэл нэн хангалуун байна.

Наурыз нь эсгий туургатны эрх тэгш нэгэн гишүүн болох казах үндэстний эртнээс баримталж ирсэн цаг тоолол ёсоор өдөр, шөнө тэнцсэн өдөр тохиодог хаврын баяр билээ.

Казах түмэн наурыз баярыг тэмдэглэхдээ амьдралын үндсийн үндэс болсон байгаль орчноо хайрлан хамгаалах үйлстэй холбохын зэрэгцээ ахас дээдсээ хүндэтгэж, багачууд хүүхдээ энхрийлж, төрөл төрөгсөд, хамаатан садантайгаа ёс төртэй золгодог зон олон.

Олон үндэстэн ястны өлгий нутаг, өнөр бүл нь Алтайн хөх уулс мэт бие биеэ түшин, эв найртай, дэм дэмэндээ тус болон урагшлан хөгжиж байна. Хонин жил Баян-Өлгийчүүдэд амжилт бүтээл, ухаарал сургамж, өгөөж буяны аль алиныг нь авчирчээ.

Ажилсаг хөдөлмөрч өвөг дээдсийнхээ үйл хэргийг залгамжилж яваа өнөөгийн Өлгийчүүдийн ажил үйлс, амьдрал ахуй өөдрөг дэвжингүй байгааг статистикийн мэдээлэл, тоо баримт нотлон харуулж байна. Тухайлбал, өнгөрсөн 3 жилд аймгийн дотоодын нийт бүтээгдэхүүний үйлдвэрлэл 152 хувиар өсчээ. Барилга угсралтын ажил эрчимтэй өсч хөрөнгө оруулалтын хэмжээ 123,1 тэрбум төгрөгт хүрч 977 хувиар өссөн байна.

Халуун хошуут мал сүргийнхээ тоог гурван жилийн өмнөхөөс 600 мянгаар өсгөж 2 сая толгойд хүргэжээ. Энэ бол жилийн дөрвөн улиралд хүйтэнд нь хөрч, халуунд нь халж яваа ажилсаг малчдын маань нөр их хөдөлмөрийн үр шим мөн.

Сүүлийн гурван жилд 415 шинэ орон сууц баригдаж айл өрхүүдэд шилжжээ.

Аймгийн хэмжээнд 2013-2015 онд шинээр 5197 ажлын байр бий болгосон нь ажилгүйдэл, ядуурлыг бууруулахад нөлөөлсөн нь дамжиггүй. Түүнчлэн гэмт хэргийн гаралт 2,3 дахин буурчээ. Эдгээр нь яах аргагүй сайшаах ёстой үзүүлэлт мөн.

Баян-Өлгийнхний бүтээсэн баялаг баруун бүсийн дотоодын нийт бүтээгдэхүүнд давамгайлж байна. Энэ бол багагүй амжилт. Амжилтаа бататгаж урагшаа тэмүүлэх эр зориг, эрч хүч Та бүхэнд бий гэдэгт гүнээ итгэж байна.

Баярын энэ өдөр улс эх орныхоо хөгжил дэвшилд Өлгий нутгийн ард иргэдийн оруулж буй хөдөлмөр бүтээлийг Монгол Улсын төр засаг өндрөөр үнэлж байна.

Ардчилал, хүний эрхийг дээдэлсэн нийгмийг цогцлоон байгуулж буй өдгөө цагт та бидэнд хийж бүтээхээс илүү эрхэм чухал зүйл үгүй билээ. Иймээс төрж өссөн нутагтаа бүтээн байгуулах их үйл хэргийг улам өрнүүлж, аж ахуйн нэгж, айл өрх, хүн бүр оршин суугаа газар бүрдээ ахуй амьдралаа тогтвортой дэгжээж дээшлүүлэх нь чухал байна.

Түүнчлэн төр, захиргааны байгууллагын удирдлага, ажилтнууд шударга ёс, хуулийг хэлбэрэлтгүй хэрэгжүүлж, иргэдийнхээ нийтлэг эрх ашигт үйлчлэх эрхэм үүргээ илүү ихээр ухамсарлаж ажиллана гэдэгт найдаж байна.           

 Эрхэм хүндэт иргэд ээ,

Өгөөж баян нутаг ус, өсөж үрждэг мал сүрэг, орчин цагийн боловсрол мэдлэг, казак түмний ажилсаг хөдөлмөрч чанар, үндэсний цөөнхөд онцгойлон ханддаг Монгол төрийн бодлого, энэ бүгд бол Баян-Өлгийчүүдийн хөгжлийн баталгаа билээ.

Аялгуут домбороо эгшиглүүлэн хаврын баяраа тэмдэглэж байгаа казах түмний маань юу санасан есөн хүсэл нь сэтгэлчлэн бүтэх болтугай.

Та бүхэн хаврын Наурыз баяраараа айл саахалт, ахмад буурлуудаа хүндэтгэн золгож, элгээрээ энх амар, төрлөөрөө төвшин амгалан, сайхан шинэлээрэй.

Монгол Улсын Ерөнхийлөгч Цахиагийн Элбэгдорж

2016 оны 3 дугаар сарын 21-ний өдөр.  Төрийн ордон” гэжээ.

 

"Болор дуран"-аар шалгав.

0 сэтгэгдэл

News.mn сайтад сэтгэгдэл оруулахад анхаарах зүйлс

Elbegdorj Eronhiilogch-d 2016-03-21 202.179.11.134

Bayan Olgii chini dan kazah bish shuu dee. Urianhai mongol, tuva, durvod tsoon ch gsen halh mongolchuud bdag ium shu dee!!!

РАВДАН 2016-03-21 202.70.46.208

ЗОО ЗОО ! ЭНЭ БИД 2 ЮУ Ч ГЭЖ БУРСАН ЯМАР Ч ЯЛГАА БАЙХГҮЙ ЭЭ! ЯМАР ХЭРЭГЖДЭГ Ч БИШ!

зочин 2016-03-21 178.190.184.12

ХҮНИЙ ЭРХИЙГ дээдлэнэ гэх нь манайд таарахгүй ОЛОНХИЙН ЭРХИЙГ дээдлэх ёстой ХУВЬ ХҮНИЙ ЭРХ ямар нэг утгаар ОЛОНХИЙН ЭРХЭД захирагдаж явах ёстой ХҮНИЙ ЭРХИЙГ ХҮНДЭТГЭНЭ гэсэн бол болох байжээ Концепцын алдаа гаргачихаж, ерѳнхийлѳгч цаашид хэлэх үгэндээ !

Зочин 2016-03-21 202.179.18.194

Олон нийт бол хариуцлага тооцох аргагүй бүрхэг зүйл. Гэхдээ тэр хувь хүнээс бүрдэнэ. Хувь хүний эрхийг дээдлэхгүйгээр олонхын эрх хангагдахгүй. Олонхийн эрх гэдгээр чиний эрхийг зөрчих аюултай. Хувь хүний эрх гэдэг тухайн хүн юу дуртайгаа хийнэ гэсэн үг биш. Харин нөгөөгийнхөө эрхээр хязгаарлагддаг болохоор хувь хүний эрх хэмжээ захтай. Тэгэхээр энэхүү эрх бол бүхний орой нь юм.

малчин 2016-03-21 122.201.31.250

Хувь хүний эрхээс олонхийн эрх үүснэ хампаанаа. хүний эрх гэж байхгүй бол олонхийн эрх гэж байхгүй.

NewsMN Гар утасны хувилбар Татах
NEWS.mn

Мэдээллийн эх сурвалж