Д.Баян-Өндөр: УХТЭ, УГТЭ-т урологийн тасаг нээгдсэнээр УНТЭ-ийн ачаалал 2 дахин буурсан | News.MN

Д.Баян-Өндөр: УХТЭ, УГТЭ-т урологийн тасаг нээгдсэнээр УНТЭ-ийн ачаалал 2 дахин буурсан

Д.Баян-Өндөр: УХТЭ, УГТЭ-т урологийн тасаг нээгдсэнээр УНТЭ-ийн ачаалал 2 дахин буурсан

Эрүүл мэндийн салбарын шинэчлэлийн хүрээнд тусламж, үйлчилгээний төвлөрлийг сааруулах бодлого хэрэгжиж буй. Энэ хүрээнд УХТЭ, УГТЭ-т урологийн тасаг нээгдэн, Улсын нэгдүгээр төв эмнэлгийн ачааллыг хуваалцаж байгаа аж. Энэ талаар Улсын нэгдүгээр төв эмнэлгийн Урологи-Андрологийн төвийн дарга, Бөөр шилжүүлэн суулгах үндэсний багийн ахлагч, Анагаах Ухааны доктор, профессор Д.Баян-Өндөртэй ярилцлаа.

-Эрүүл мэндийн салбарын шинэчлэл хийгдэж, тогтолцоо нь бодлогын хувьд өөрчлөгдөж байгаа гэдэг. Та үүнтэй санал нийлэх үү?

-Би хэдэн жилийн өмнө ярилцлагадаа эмнэлгийн гадаа капитализм, эмнэлэг дотор социализмын тогтолцоотой хэвээр байна хэмээн хэлж байсан. Харин одоо системээрээ өөрчлөгдөх боломж бий болж, эхлэл нь тавигдаж байна гэж харж байна. Тодорхой жишээ дурдахад бөөрний мэс заслын тусламж үйлчилгээг улсын хэмжээнд Урологи-Андрологийн төв ганцхан Улсын нэгдүгээр төв эмнэлэгт (УНТЭ) л төвлөрөн хийж байсан. Орон нутаг, нийслэлээс дээрх төрлийн тусламж үйлчилгээг авах иргэд бүгд зөвхөн манай төвд ирж саяхныг болтол үйлчлүүлдэг байлаа. Харин Эрүүл мэндийн сайд Т.Мөнхсайхан төвлөрлийг сааруулах бодлогын хүрээнд урологи-андрологийн чиглэлд дараах ажлуудыг санаачлан ажиллаж, дэмжлэгт удирдлагаар хангаж байна.

Нэгдүгээрт, Манай төв 10-аад эмчтэй, одоо бид хүчин чадлыг нэмэгдүүлж, тусламж үйлчилгээгээ үзүүлж байна. Одоо улсын хэмжээнд 60 гаруй урологийн эмч ажиллаж байна. Эдгээр эмч нарыг чадавхижуулахаар орон нутагт ажлын байрны сургалт зохион байгуулж эхэлсэн.

Хоёрдугаарт, Ховд, Орхон, Дорнод аймгаас бусад аймгуудад бөөрний мэс заслын зөвхөн нээлттэй мэс засал хийж байна.

Урологийн салбарт нийт мэс заслын 80 орчим хувь нь зайлшгүй дурангийн аргаар хийгддэг. Тиймээс бид аймгуудын эмнэлгүүдийг бөөрний мэс заслын дурангаар хангах нэлээд том төсөвтэй төслийг ЭМЯ-нд өргөн барьсан. Удахгүй шийдэгдэнэ гэж найдаж байна.

Гуравдугаарт, УНТЭ-ийн Урологи-андрологийн төвийн эмч нарын нөөц бололцоог ашиглан, манай хоёр эмч УХТЭ, УГТЭ-үүдэд урологийн тасаг байгуулахаар зургаан сарын хугацаагаар томилогдон ажиллаж байна. Дээр дурдсан гурван том ажил нь эрүүл мэндийн салбарын шинэчлэлийн хүрээнд төвлөрлийг бодитоор сааруулах, чирэгдлийг бууруулах том алхам болж байгаа юм.

-Улсын хоёр, гуравдугаар төв эмнэлгүүд танайх шиг бөөр, шээсний замын бүх төрлийн тусламж, үйлчилгээг үзүүлдэг болж байгаа гэсэн үг үү? 

-Эрүүл мэндийн сайдын өгсөн чиглэлийн дагуу энэ оны арваннэгдүгээр сарын 1-нээс УХТЭ, УГТЭ-т урологийн чиглэлээр тусламж, үйлчилгээг нэвтрүүлэх, хүний нөөцийг чадавхижуулах, сургах ажил хийгдэж эхэлсэн.

Энэ хүрээнд УХТЭ, УГТЭ-т урологийн тасаг шинээр нээн, УНТЭ-ийн урологи-андрологийн төвийн чадварлаг, тэргүүлэх зэрэгтэй эмч нарыг тасгийн эрхлэгчээр томилон, шинэ баг үүсгэн ажиллуулж эхэлсэн.

Эхний ээлжинд төлөвлөгөөний дагуу зургаан сарын хугацаанд туршлагатай эмч, мэргэжилтнээ шинэ залуу эмчээр солилцон, ажлын байрны сургалт хийж байна. Цаашид нэмж зургаан сарын хугацаатай үргэлжлүүлэн сунгах бодолтой байна. Эхнээсээ үр дүнгээ өгөөд явж байна.

-Улсын хоёр, гуравдугаар төв эмнэлгүүдийн хувьд урологийн чиглэлээр хэдэн ортой тасаг байгуулагдсан бэ?

-УГТЭ-ийн хувьд мэдрэл, зүрх судасны чиглэлээр дагнан тусламж, үйлчилгээ үзүүлдэг. Харин одоо төвлөрлийг сааруулах ажилд оролцон, урологийн чиглэлээр тусламж үзүүлээд хоёр сар болох гэж байна. Тус эмнэлэг 3 урологийн эмчтэй, 10 ортой тасаг байгуулан ажиллаж байна. Харин УХТЭ-ийн хувьд 4 урологийн эмчтэй, 10 ортой тасаг ажиллаж байна. УХТЭ, УГТЭ-ийн удирдлага маш сайн санаачилгатай дэмжин ажиллаж байна.

-Улсын хоёр, гуравдугаар төв эмнэлгүүд урологийн тусламж үзүүлээд ирэхээр танай төвийн ачаалал буурч байна уу?

-Тийм ээ. Үр дүн эхнээсээ гарч байна. Удахгүй УХТЭ, УГТЭ-үүд багаж, тоног төхөөрөмжөөр бүрэн хангагдахаар манай төвд хийгддэг бүх мэс заслыг хийдэг болно гэсэн үг.

Өмнө нь ганцхан манай төвд урологийн бүх шинжилгээ хийгдэж, мэс заслын товыг эмч нарын зөвлөгөөнөөр гаргадаг байсан. Үүнээс болж мэс заслын товын хүлээлт гэхэд л доод тал нь 1-2 сар болдог. Улмаар хөдөө, орон нутгаас ирж буй иргэд, яаралтай мэс засалд орох өвчтөнүүдийн хувьд хүлээлт ихтэй маш хүндрэлтэй байсан. Одоо энэ асуудал шийдэгдэж эхэлж байна.

Жишээ нь, манай төвд мэс засал хийлгэхээр хүлээж байсан 140 гаруй хүн сар хүрэхгүй хугацаанд хоёр дахин багассан.

УГТЭ-ийн урологийн тасагт бөөрний мэс заслын тоо 4 дахин, УХТЭ-ийн урологийн тасагт төлөвлөгөөт мэс засал 2 дахин яаралтай мэс засал 4 дахин нэмэгдээд байна. Бидний цаашдын зорилго бол өнөөдөр шинжилгээ өглөө гэхэд тухайн долоо хоногтоо багтаад мэс заслын эмчилгээ хийлгэдэг болгох юм.

-Төрөлжсөн төв гурван том эмнэлэгт урологийн тусламж үзүүлдэг болчихлоо. Орон нутагт хэзээнээс хэрэгжих вэ?

-Баян-Өлгий, Ховд, Увс аймгуудаас Улаанбаатар хотод ирж хоёр сар хүлээж мэс засал хийлгээд, мэс заслын дараах эмчилгээ болон хяналт нь дахиад нэг сар гэж үзвэл нийт гурван сарын турш эмчилгээ хийлгэх шаардлагатай болдог. Иймээс Эрүүл мэндийн яамнаас хөдөө, орон нутгийн эмнэлгүүдийг шаардлагатай багаж, төхөөрөмжөөр хангах төслийг хэрэгжүүлэх гэж байна. Бид орон нутагт ажиллаж байгаа хэвлийн дурангийн мэс заслын багаж тоноглолын тоон үзүүлэлтүүдийг судлан, шаардлагатай багаж төхөөрөмжийн жагсаалтыг ЭМЯ-нд өгсөн.

Ер нь хэвлийн мэс заслын дурангийн дэлгэц, гэрэл үүсгэгч, камер зэрэг нь бүх салбарын мэс засалд ижилхэн хэрэглэгддэг. Энэ аппарат дээр 100-200 сая төгрөгийн үнэтэй бөөрний мэс заслын багажийг нэмээд аваад тавьчхад л манай салбарын дурангийн багаж төхөөрөмж бүрэн болж, бөөрний дурангийн мэс засал хийх боломжтой болно.

Цаашид хөдөө, орон нутагт урологи-андрологийн  шаардлагатай тусламж, үйлчилгээ асуудалгүй үзүүлдэг болно. Харин нарийн багаж, төхөөрөмж шаардлагатай, хүнд болон олон өвчин хавсарсан өвчтөнийг УНТЭ-т шилжүүлэн авч эмчлэх юм. Ингэснээр бид өвчтөнд чирэгдэл багатай, шуурхай, хугацаа алдалгүй улсын хэмжээнд урологийн тусламжийг иргэддээ үзүүлдэг болно. Энэ нь ойрын хугацаанд биелэгдэх боломжтой ажил гэж бодож байна.

-Covid-19-тэй холбоотойгоор танайд яаралтай мэс засал, тусламж үйлчилгээг хэрхэн зохион байгуулж байгаа вэ?  

-Сovid-19-ийн хөл хориотой үед хавдартай хүмүүсээ бүгдийг нь дуудаж, мэс засал хийсэн. Мөн хотод байгаа, Covid-19-ийн шинжилгээ өгсөн, хүлээгдэлтэй байгаа яаралтай мэс заслын заалттай хойшлуулшгүй өвчтөнүүдэд эмчилгээг шуурхай хийж байна. Гэхдээ өвчтөн хоорондын зай, онцгой нөхцөл байдалтай холбоотойгоор тусламж үйлчилгээ маань 30 орчим хувь буурсан.

Эх сурвалж: ЭМЯ

Энэ мэдээнд өгөх таны сэтгэгдэл?
5
ЗөвЗөв
0
ХахаХаха
0
ХөөрхөнХөөрхөн
0
ГайхмаарГайхмаар
0
ХарамсалтайХарамсалтай
0
ТэнэглэлТэнэглэл
0
БурууБуруу
Баярлалаа!

Холбоотой мэдээ

7 сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2020-12-22 202.9.40.41

Баян-Өндөр эмчид их баярлаж явдаг даа. Эрүүл энх сайн сайхныг хүсэе!

Avatar

зочин 2020-12-22 66.181.166.70

нэгдүгээр эмнэлгийн Баянөндөр даргатай урологи андрологийн тасгийн хамт олонд улам их амжилт хүсье. Зөв хандлагатай бүтээлч чадварлаг эмч дээ.

Avatar

Зочин 2020-12-22 202.9.46.95

УГТЭ-УЛСЫН ГУРАВДУГААР ТӨВ ЭМНЭЛЭГ/ШАСТИНЫ/
УХТЭ-УЛСЫН ХОЁРДУГААР ТӨВ ЭМНЭЛЭГ /ХУУЧНААР САЙД НАРЫН 2
УНТЭ-УЛСЫН НЭГДҮГЭЭР ТӨВ ЭМНЭЛЭГ.
ЭРҮҮЛ МЭНДИЙН САЙДААР МЭРГЭЖЛИЙН ХҮН ТОМИЛОГДСОНД ҮНЭХЭЭР БАЯРЛАЖ БАЙНӨӨ. ЭНЭ ӨӨРЧЛӨЛТҮҮД ХИЙГДЭЖ 2-Р ЭМНЭЛЭГТ САЯХАН ХАГАЛГААНД ОРСОН ХҮН БАЙНА. ЭРҮҮЛ МЭНДИЙН САЛБАРЫНХАНДАА БАЯРЛАЖ БАЙНӨӨ

Avatar

Зочин 2020-12-22 202.21.100.210

Ахдаа ажлын амжилт хүсэн ерөөе. Эрүүл энх аз жаргалыг хүсье.

Avatar

huuuh 2020-12-22 192.82.69.18

Saihan medee bn. Tehdee УХТЭ, УГТЭ-т gej ali emnelegiig heleed bn ve? Ene tovchloluudaa tailbarlaad uguuch

Avatar

Зочин 2020-12-22 202.21.104.2

Сэтгэл, зүтгэлтэй сайн эмч шүү. Ажлын өндөр амжилт хүсэн ерөөе.

Avatar

зочин 2020-12-22 122.201.19.99

Баяр хүргэж, амжилт хүсье

NewsMN Гар утасны хувилбар Татах
NEWS.mn

Мэдээллийн эх сурвалж