Алтан бөмбөгийн эзнээр зургаан удаа тодорсон Лионель Мессиг багаасаа явна гэсэн шуум үргэлжилсээр байна. Сүүлд гарсан мэдээллээр Францын ПСЖ багийн удирдлагууд багийнхаа албан ёсны болон хамтран ажилладаг дэлгүүрүүдэд "Лионель Месси ирнэ, түүнийг зарлахад бэлдээрэй" гэж хэлсэн гэнэ. Мөн бизнесийн түншүүддээ Мессиг Парист ирэхэд бэлэн байгаарай хэмээсэн тухай эх сурвалжууд мэдээлжээ.

Лионель Мессигийн Барселона багтай байгуулсан гэрээ ирэх 2021 оны зун дуусах бөгөөд нэгдүгээр сараас эхлэн ПСЖ, Манчестер Сити зэрэг багуудтай холбогдон гэрээ байгуулах яриа эхлүүлж болох аж. Өдгөө 33 настай түүнийг Барселона багтайгаа шинэ гэрээ байгуулахгүй гэж мэргэжилтнүүд үзэж байна.

Хэрэв Лионель Месси ирэх зун үнэгүй эсвэл өвлийн солилцоо наймааны цонхоор ПСЖ багт ирэхээр болвол ганц асуудал байгаа нь түүний 10 дугаар. Одоогоор ПСЖ багийн 10 дугаарыг Бразил довтлогч Неймар эзэмшиж буй.

ПСЖ болон Барселона багууд УЕФА Аваргуудын лигийн хасагдах шатанд учраа таарсан бөгөөд хоёр багийн эхний тоглолт ирэх хоёрдугаар сарын 17-нд явагдана.