Covid-19 цар тахлын тархалт эрчимжиж буй энэ үед дэлхийн агаарын тээврийн салбарынхан нислэгийн багийнхныг аюулгүй байлгах арга замыг эрэлхийлсээр байна.

Хятадын иргэний нисэхийн ерөнхий газар (CAAC) арваннэгдүгээр сарын 25-нд нислэгийн үед мөрдөх журамдаа өөрчлөлт оруулж, нисэх багийнхан Covid-19 халдвараас сэргийлэхийн тулд нислэгийн туршид живх хэрэглэх зөвлөмжийг нэмжээ.

Уг зөвлөмжид өндөр эрсдэлтэй улс орнууд руу нислэг үйлдэж буй нислэгийн багийнхан нэг удаагийн бээлий, эмнэлгийн маск, нүдний шил, нэг удаагийн хамгаалалтын хувцас, малгай, гутлын улавч хэрэглэхээс гадна онгоцны ариун цэврийн өрөө ашиглахаас зайлсхийж живх хэрэглэх ёстой хэмээн дурдсан байна.

Онгоцны ариун цэврийн өрөө бол халдвар авах хамгийн өндөр эрсдэлтэй газруудын нэг тул ийм зөвлөмж гаргажээ. Японы агаарын тээврийн “ANA” компани энэ оны эхээр гар хүрэхгүйгээр ашиглаж болох ариун цэврийн өрөөний шинэ загварыг туршиж эхэлсэн бол “Boeing” компани нь ариун цэврийн өрөөний нянг хүн ороод гарах бүрт 99.9 хувь устгах хэт ягаан туяаны технологийг нэвтрүүлээд байгаа билээ.

Эх сурвалж: CNN, RT