Дархан-Уул аймгийн Засаг дарга Б.Азжаргал авто вокзалынхаа танхимын үүд хавьд суун, Улаанбаатар хотоос ирж буй иргэдээ тосч, аймгаасаа орон нутаг, нийслэлийг зорьж буй иргэдийг үддэг ажилтай болжээ.

Харуй бүрий болсон ч харихыг үл бодон вокзалын “сахиул” болсон түүнийг ард иргэд нь “Хүмүүст асуудал тулгарвал дэргэд нь байгаа тул шууд шийдвэрлэнэ. Нийслэлийн онцгой комисс, Нийслэлийн эрүүл мэндийн газрын дарга нар шиг утас руу нь 60 удаа залгахад аваагүй гэх асуудал гарахгүй. Мөн удирдлага дор нь байгаа хүмүүс ард иргэддээ хэрхэн үйлчилгээ үзүүлж, асуудал тулгарвал хэрхэн эв зүйг нь олж, шийдэж байна вэ гэдгийг давхар хараад багийнхныхаа ажлыг ч давхар шалгаад байх шиг” гэж ярьж байна.

Covid-19  цар тахал Дархан-Уул аймагт  тархсан нь тодорхой болсон даруйд Засаг дарга Б.Азжаргал аймгийн хэмээнд тэг зогсолт зарлан, ажилласан нь төмөр зам дагасан халдварын голомтыг таслан зогсооход чухал алхам болсон юм.

Тухайлбал, тэг зогсолт хийн, хатуу хөл хорио тогтоосон хугацаанд ард иргэдэд хүнс, түлшийг нь ямар аргаар хүргэх вэ гэдгээс эхлээд нарийн зохион байгуулалт хийн, хүргэлтийн үйлчилгээнд шилжүүлж, шуурхай утас ажиллуулан, ард иргэдийнхээ санал гомдлыг тэр даруй шийдвэрлэж, мөн “Нэг өрх, нэг иргэн” шинжилгээг яаралтай зохион байгуулж ажилласнаар Дархан-Уул аймаг төмөр зам дагасан халдварын голомтыг хяналтдаа авсан.

Гаргасан шийдвэрээ ард иргэддээ тухай бүрт нь ойлгомжтой тайлбарлаж, асуудал гарвал шуурхай утас руу залгадаг юм шүү хэмээн захиас дайж, цаг наргүй ажилласан тэрбээр энэ үйлдлээрээ бусад аймаг, нийслэлийн Засаг дарга, Онцгой комиссын дарга нартай харьцуулахад илүү чадварлаг, ажил хийж, ачаа үүрч сурсан хүний зангарагтайгаа харуулсан билээ.

Г.ХОРОЛ