АНУ-ын Юта мужийн өмнөд хязгаарын цөлд нэгэн нууцлаг металл хөшөө бий болсныг байгаль хамгаалагчид нисдэг тэргээр шалгалт хийх үеэрээ олсон талаар мэдээлсэн билээ. “Red Rock” цөлд босгон байрлуулсан энэ хөшөөг байгаль хамгаалагчид аргалийн тоо толгойг судлах үеэрээ илрүүлсэн бөгөөд уг металлыг чухам хэн энд босгосон нь нууцлаг хэвээр байсан юм.

Харь гаригийнхны илгээмж, эсвэл минималист барималчдын нэгний бүтээл байж магадгүй гэж таамаглаж байсан уг хөшөө долоо хоногийн дараа гэнэт гарч ирсэн шигээ алга болжээ.

Гэтэл дараагийн долоо хоногт нь дэлхийн нөгөө талд буюу Румыний Пиатра Неамт хотоос дээрхтэй төстэй металл хөшөө олдоод удалгүй дахин алга болсон юм.

Тэгвэл Лхагва гаригийн өглөө /2020.12.02/  Стэнли Кубрикийн ‘2001: A Space Odyssey’ кинонд гардаг байгууламжийг санагдуулам нууцлаг цул металл хөшөө Калифорни мужийн Атасцадеро хотын нарсан ойгоос гурав дахь удаагаа илрүүлжээ. Эдгээр нууцлаг металл хөшөөнүүд чухам юу болох, хэн, ямар зорилгоор ингэж байрлуулж байгаа талаар цахим сүлжээнд хэрэглэгчид мэтгэлцсээр байна.

Эх сурвалж: RT