Тээвэрчдийг PCR шинжилгээг үндэслэн гэрт нь буцаана

Улсын онцгой комисс, Өмнөговь аймгийн онцгой комисс өчигдөр (2020.12.01) цахимаар хуралдаж, хэд хэдэн асуудал шийдсэн байна. Тухайлбал, нүүрс тээврийн жолооч нарыг Цагаан хадны бүст өгсөн PCR шинжилгээг үндэслэн, 14 хоног тусгаарлалтад оруулахгүйгээр нутаг оронд нь буцаж болох талаар шийдвэр гаргажээ.

Улсын онцгой комисс тээвэрчдийн хүсэлтийг харгалзан үзэж, кабиндаа тусгаарлагдсан хоногийг тооцож, дахин тусгаарлалтад оруулахгүй, PCR шинжилгээний бичгээр нь гэрт нь буцаах зохицуулалт хийх аж. Энэ талаар “Баян зам” тээвэрчдийн холбооны Удирдах зөвлөлийн дарга П.Баярхүүгээс тодрууллаа. Тэрбээр “Өнөөдрийн байдлаар 2100 орчим хоосон тээврийн хэрэгсэл тайван зогсоолд байна. "Нүүрс ачилт буулгалтын талбай" гаалийн баталгаат агуулахын хашаанаас гурав хоногт 200-250 машин гаргаж буй боловч ачилт хийхгүй байгаа тул хашааны гадна тээвэрчид 10-14 хоног кабиндаа хонож байна.

Монгол талд бүх жолооч PCR шинжилгээ өгч байгаа. Гэхдээ Хятадын хил рүү орсон жолоочоос давхар шинжилгээ авч, хариу нь сөрөг гарсан нөхцөлд хилээр оруулж байна. Сүүлийн дөрөв хоногт өдөртөө 80-100 тээврийн хэрэсгэл хил гарч, ихэнх нь шинжилгээ өгөөд хариу гартал буцаж байна. Өөрөөр хэлбэл, Хятадын талд өгсөн шинжилгээний хариу гартал жолооч нарыг буцааж байна. Ингэснээр хил талдаа ачаатай машинууд гацаад байна. Иймд 6000 машины тоог цөөрүүлж, жолооч нарыг гэрт нь буцааж, компаниудад квот өгч, машинуудыг 50/50 хувиар тээвэрт оруулж, ажлын байр хадгалах зохицуулалт хийх шаардлагатай байна. Бид энэ талаарх хүсэлтээ Зам, тээврийн хөгжлийн яам болон Улсын онцгой комисст хүргүүлсэн боловч арга хэмжээ авахгүй байна” гэв.

А.СҮРЭН