АНУ-ын Мерриам Вебстерийн толь бичиг “Цар тахал” гэдэг үгийг 2020 оны онцлох үгээр тодруулжээ. Цахим толь бичигт хамгийн олон хайлт хийгдэж, өнгөрсөн онуудтай харьцуулахад олны анхаарлыг хамгийн их татсан үгсэд дүн шинжилгээ хийсний үндсэн дээр онцлох үгийг нэрлэдэг юм.

Тус улсад Covid-19 халдвар авсан анхны өвчтөн эмнэлгээс гарах үед буюу хоёрдугаар сарын 3-наас “цар тахал” гэх үгний хайлт огцом нэмэгдсэнийг судлаачид тооцоолжээ. Энэ үед “цар тахал” хэмээх үгний хайлт өнгөрсөн оныхоос 1621 хувиар нэмэгдсэн бол гуравдугаар сар гарснаас хойш 4000 хувиар нэмэгдсэн байна. Дэлхийн эрүүл мэндийн байгууллага гуравдугаар сарын 11-ний өдөр Covid-19 халдварт өвчнийг цар тахал хэмээн зарлах үед энэ үгний хайлт 115806 хувиар нэмэгджээ.

Өнгөрсөн 2019 онд “They” буюу “Тэд” гэх үг онцлох үгээр тодорч байв. Учир нь өнгөрсөн онд бэлгийн чиг баримжаа ялгаатай ЛГБТИ хүмүүсийг төлөөлүүлэн “they” гэж хэрэглэх нь түгээмэл болсон юм.

Эх сурвалж: REUTERS