АНУ-ын Юта мужийн өмнөд хязгаарын цөлд нэгэн нууцлаг металл хөшөө бий болсныг өнгөрсөн долоо хоногт байгаль хамгаалагчид нисдэг тэргээр шалгалт хийж байх үеэр илрүүлсэн билээ.

“Red Rock” цөлд босгон байрлуулсан энэ хөшөөг байгаль хамгаалагчид аргалийн тоо толгойг судлах үеэрээ илрүүлсэн бөгөөд уг нууцлаг металлыг чухам хэн энд босгосон нь нууцлаг хэвээр байв. Харь гаригт итгэгсэд гурван метр орчим өндөртэй уг металлыг харийнхний илгээмж гэж тайлбарлаж байсан бол зарим нь минималист барималчдын нэгний бүтээл байж магадгүй гэж тайлбарлаж байв.

Тэгвэл энэхүү металл саяхан гэнэт алга болсон талаар Юта мужийн байгаль орчны газар мэдээлжээ. Тус байгууллагын мэдээлснээр нууцлаг металлыг бүлэг хүмүүс хулгайлсан байх магадлалтай гэнэ.

Анх ийм нууцлаг металл олдлоо гэх мэдээллийн дараа мужийн эрх баригчид хүмүүс эзгүй цөлд төөрөх эрсдэл бий болохоос сэргийлж хөшөөний байрлалыг нууцалж байсан юм. Гэсэн ч адал явдалд дурлагч, сониуч хүмүүс маш хурдан хөшөөний байрлалыг олж мэдээд “Red Rock” цөл рүү аялж эхэлсэн байна. Зарим нь гэр бүлээрээ, найзуудаараа ирж зургаа авхуулж, цахим сүлжээнд тавих явдал ихэссэн байна.

Тим Слэйн гэдэг хүн эхлээд байгаль хамгаалагчдын нисдэг тэрэгний явсан замын дагуу газрын зураг дээр мөрдөж, хөшөөний байрлалыг тогтоосноо онлайн орчинд зарласан юм.

Эх сурвалж: RT