Нийслэлийн онцгой комиссын шуурхай штабаас өнгөрөгч 24 цагийн нөхцөл байдал, хэрэгжүүлсэн арга хэмжээнүүдийн талаарх ээлжит (2020.11.29) мэдээлэл өглөө.

НОК-ын Шуурхай штабын удирдлагын багийн гишүүн Э.Эрдэнэбаатар:

-Өнгөрсөн хоногийн хугацаанд нийслэлд шинээр таван тохиолдол нэмэгдэж, нийт тохиолдол 75 боллоо. Авто тээврийн шалган нэвтрүүлэх товчоодоор 953 тээврийн хэрэгсэл гарч, ариутгал халдваргүйжүүлэлтийн ажлыг зохион байгууллаа. Нийслэлийн хэмжээнд 20 шинжилгээний цэгийг шинээр байгуулж, хөдөө орон нутаг руу зорчих иргэдийг шинжилгээнд хамруулж эхэллээ. Шинжилгээний цагаа аваагүй, маргаашийн шинжилгээний цаг авсан хүмүүс ихээр ирж, бөөгнөрөл үүсгэж байна. Энэ тал дээр цагдаагийн байгууллага хяналт тавьж ажиллаж байна. Шинжилгээ авах ажил 10 өдөр зохион байгуулагдана. Эдгээр 20 цэг дээр 280 эрүүл мэндийн ажилчид ажиллаж байна.

Нийтийн тээврийн 84 чиглэлд, 458 автобус үйлчилгээнд гарлаа. Амралтын өдрүүдэд нийтийн тээврийн үйлчилгээг багасгах, иргэдийн хөдөлгөөний тоо цөөрүүлэх чиглэлд ажиллаж байна. Нийтийн тээврийн хэрэгслийг дундын болон эцсийн цэгт ариутгаж байна. Мөн хяналтын ажилтанг тогтмол ажиллуулж байна.

Нийслэлийн хэмжээнд 6841 аж ахуй, нэгж байгууллагын 1,853,200 мкв талбайд урьдчилан сэргийлэх халдваргүйтгэл хийж гүйцэтгэлээ. Нийслэл, дүүргийн тохижилт үйлчилгээний ажилчид 1699 тонн хог хаягдлыг цэвэрлэж, хаялаа. Мөн 2446 кг хог хаягдлыг зохих журмын дагуу устгалаа.

Мөн 243 борлуулалтын цэг дээр 1860 тонн сайжруулсан түлшийг тээвэрлэж хүргэсэн байна. Зорилтот бүлгийн 500 айл өрхөд 500 тонн сайжруулсан түлшийг хүргэлээ. Нийслэлийн шуурхай штабын 11-324207, 11-321731 утсанд нийт 283 санал хүсэлт ирсэн. Тусгай 13 чиг үүргийн байгууллагын 22357 тээврийн хэрэгсэлд Qr код олгоод байна.