Энэ сарын эхээр Умард Солонгосын дүрвэгч А хэмээх эр өмнөд Солонгосын хилийн Ганвон мужийн өндөр хамгаалалттай, хоёр давхар, 3 метр өндөртэй төмөр хашааг даван хэнд ч баригдалгүйгээр хил зөрчжээ. Тэрбээр өөрийгөө гимнастикаар хичээллэдэг, муугүй авьяастай нэгэн хэмээн мэдүүлсэн байна.

Засгийн газрын эх сурвалжуудын мэдээлж байгаагаар А гэгч тагнуулын албаны удирдлагуудын зохион байгуулж буй мөрдөн шалгах ажиллагааны дагуу мэдүүлэг өгчээ. Тус мэдүүлэг нь хүн итгэхэд бэрх байсан тул эрх баригчид түүний мэдүүлгийн үнэн эсэхийг шалгуулахаар ажлын хэсэг томилж, хил рүү илгээсэн байна.

А гэгч нь намхан биетэй, 50 кг жинтэй бөгөөд жижиг бие нь түүнийг 3 метр өндөр хашаа давахад "тус" болжээ.

Үнэн хэрэгтээ болсон явдлын дараахан хилийн манааны цэрэг хашааны дээгүүр татсан төмөр утас бага зэрэг доош дарагдсан байхыг анзаарсан ч тасдаж нугалсан, мушгисан зэрэг ноцтой гэмтэл учраагүй байсан тул тоолгүй өнгөрсөн байна.

Харин дүрвэгчийн мэдүүлгээс хойш хилийн цэргүүд тухайн үед яагаад хилийн хашаанд суурилуулсан мэдрэгч ажиллаж, дохиолол дуугараагүйн шалтгааныг тогтоохоор ажиллаж байгаа аж.

Жил бүр олон арван хүн БНАСАУ-аас БНСУ руу дүрвэн гардаг бөгөөд ихэвчлэн БНХАУ-аар дамжин дүрвэдэг бол шууд Өмнөд Солонгосын хилээр гарах тохиолдол бараг үгүй юм байна. Учир нь хоёр Солонгосын хил маш өндөр харуул хамгаалалттай тул баригдалгүй хил зөрчинө гэдэг бараг боломжгүй ажээ.

Эх сурвалж: YONHAP