Бүх нийтийн бэлэн байдлын зэрэгт шилжсэнтэй холбогдуулан Цагдаа, Дотоодын цэрэг, Дотоод хэргийн их сургуулийн сонсогч нийлсэн 6000 орчим алба хаагч 24 цагаар үүрэг гүйцэтгэж байгаа билээ. Ард иргэдийнхээ төлөө цаг наргүй зүтгэж байгаа тэдний үйлдэл олон нийтийн сүлжээнд эерэг хандлагыг түгээсэн бол зарим нь шүүмжлэл дагуулаад буй. Хатуу хөл хорионы үеэр эргүүлээр ажиллаж буй цагдаа нарын хөгжилтэй зураг, бичлэгээс онцлон хүргэе. 

• Цагдаагийн "Сүлд" чуулгын алба хаагчид Баянзүрх дүүргийн нутаг дэвсгэрт явган эргүүлийн үүрэг гүйцэтгэж байна. Хатуу хөл хорионы үеэр өдөржин гадаа ажилласан тус чуулгын бүжигчин Б.Гантогтох монгол ардын бүжиг бүжиглэсэн нь олны хайр хүндлэлийг хүлээсэн юм.

• Түгжрэлээ санасан цагдаа нэртэйгээр олон нийтийн сүлжээнд цацагдсан бичлэг мөн л ард иргэдийн сэтгэлийг хөдөлгөв. Хэдийгээр улс даяар хатуу хөл хорио тогтоосон ч ард иргэдийнхээ төлөө зүтгэж буй энэ бичлэгийн дор хүмүүс олон урмын үг хайрлажээ.

• Цагдаагийн алба хаагчид иргэд болон тээврийн хэрэгслийн хөдөлгөөнд хяналт тавихаас гадна аюулт цар тахлаас урьдчилан сэргийлж, гэртээ байхыг уриалж байна.

• Хөл хориог улам чангатгасан энэ үед Зайсан орчимд шаардлага тавьсан цагдаа, иргэний хооронд үл ойлголцол үүсч, хүч хэрэглэсэн нь сошиал орчинд хүмүүсийг талцуулаад амжсан.

А.СҮРЭН