ОХУ-ын Чеченийн тэргүүн Рамзан Кадыров хүүхдийн тоглоомын төвийн ханан дээр дүрсэлсэн Marvel цувралын баатруудын зургийг арилгахыг үүрэгдсэн байна. Рамзан Кадыров Чеченийн Курчалое хотын хүүхдийн тоглоомын төвд зочлох үеэрээ энэ үүргийг өгсөн бөгөөд америк цувралын баатруудын оронд үндэсний баатруудын зургийг зурахыг зөвлөжээ.

Энэ тухайгаа тэрбээр "ВКонтакте" сүлжээн дэх өөрийн албан ёсны хаягтаа бичжээ. “Курчалое хотын шинээр баригдсан орон сууцны хорооллын ажилтай танилцаж, бэлэн байдлыг шалгалаа. Энэ хороолол ашиглалтад ороход бэлэн болоод байгаа юм. Тэнд хүүхдийн тоглоомын төвөөр ороход ханыг нь Marvel цувралын Капитан Америк, Тор, Төмөр хүн зэрэг баатруудын зургаар чимжээ. Ийм зохиомол баатруудын дүрийг энд байлгах шаардлагагүй. Манай түүх, шашны олон бодит баатрууд байдаг. Эдгээр баатруудаас үлгэр жишээ авч болно” хэмээн хэлснээ Кадыров сошиал сүлжээндээ хуваалцсан байна.

Курчалое хотын шинэ хороолол нь хоёр есөн давхар, найман давхар дөрөв, долоон давхар гурван байраас бүрдэж байгаа бөгөөд нийтдээ 264 орон сууцтай, худалдааны төв, оффисын төв гээд амьдарч, ажиллах орчин бүрдсэн юм. Курчалое нь өмнө нь дүүргийн статустай байсан бөгөөд Чеченийн парламентын шийдвэрээр 2019 оноос хот болгон статусыг нь өөрчилсөн юм. Одоогоор 26 мянган оршин суугчтай юм.

эх сурвалж: риа новости