Олон улсын олимпийн хороо/ОУОХ/-ны ерөнхийлөгч Томас Бах энэ өдрүүдэд Японы Токио хотноо ажлын айлчлал хийж байгаа билээ. Тэрбээр өчигдөр/2020.11.16/ “Токио-2020” зуны олимпийн зохион байгуулах ажлын хэсгийн ахлагч Мори Ёширогийн хамт хэвлэлийн бага хурал хийж, зайлшгүй авах ёстой зарим чухал ажлаа танилцуулсан байна.  Тодруулбал, ирэх онд цар тахлын эсрэг вакцин авах боломж олдвол олимпод оролцох баг тамирчдад вакцин хийх зардлыг ОУОХ хариуцаж болох юм гэж мэдэгджээ. Гэхдээ тамирчдыг заавал вакцин хийлгэ гэж шаардахгүй аж. Сайн дурын үндсэн дээр гэдгийг онцолсон байна.