Ойрын хугацаанд Ватиканд цахим сүлжээний менежер гэдэг орон тоо үүсч магадгүй гэнэ. Учир нь Ромын Пап лам Францис өөрийн албан ёсны инстаграм хаягаараа бикини моделийн хагас нүцгэн зураг дээр “зүрх” дарсан нь баригдаж, олны анхаарлын төвд оржээ.

Гэвч Пап ламын туслахууд дээрх мэдээллийг эрс үгүйсгэж, “Пап Францисын инстаграм хаяг 27 настай Бразилийн бикини модель Наталиа Гариботтогийн зураг дээр “зүрх” дарсныг  хуурамчаар үйлдсэн байна” хэмээн мэдэгдсэн аж.

Харин Наталиа Гариботто өөрийн инстаграм болон твиттер хаяг дээрээ зураг дээр нь “зүрх” дарсан Пап ламын инстаграм хаягийг бичлэг болгон баримтжуулж нийтлээд “Би ч диваажинд очих нь баттай боллоо доо” хэмээн хошигносон байна. Түүний нийтэлсэн зураг дээрх Пап ламын хаяг 7.2 сая дагагчтай, Franciscus нэртэй албан ёсных мөн гэдгийг хүмүүс баталж байгаа юм.

View this post on Instagram

A post shared by ɴᴀᴛᴀ ɢᴀᴛᴀ (@nataagataa)

Гариботтогийн зураг дээр “зүрх” дарсан хаягуудаас  Пап ламынх устгагдсан хэдий ч хэтэрхий хожимдсон бололтой. Учир нь дээрх үйл явдал цахим орчинд хэдийн шуугиан тарж, хэрэгт дуртай хүмүүсийн ярианы гол сэдэв болжээ.

Зарим хүмүүс үүнийг худлаа мэдээлэл хэмээн байр сууриа илэрхийлж байгаа бол зарим нь дээрх мэдээллийг үнэн, гэхдээ Пап лам Францис хаягаа өөрөө хөтөлдөггүй байх хэмээн үзэж байгаагаа бичжээ.

Дашрамд сонирхуулахад,  Пап лам энэ оны эхээр бэлгийн таашаал бол бурханлиг зүйл хэмээн онцлоод “Амттай хоол идэх нь эрүүл мэндэд ч давхар ашиг тустай таашаал мөн. Бэлгийн ажил үүнтэй яг ижил. Бэлгийн таашаал бол тун бурханлиг зүйл бөгөөд хайр дурлалыг улам сайхан болгох ид шидтэй зүйл” хэмээн хэлж байсан билээ. Үүнийг нэхэн санасан зарим хүмүүс түүнийг өөрөө моделийн зураг дээр “зүрх” дарсан гэдэгт итгэлтэй байгаа гэнэ.

Эх сурвалж: RT.COM