Улсын Онцгой комиссоос “Хилийн боомтоор тээвэрлэлт хийх үеийн халдвар, хамгааллын арга хэмжээг эрчимжүүлэх” албан даалгаврыг гаргалаа. Гамшгаас хамгаалах тухай хуулийн 28 дугаар зүйл, Засгийн газрын 2020 оны 178 дугаар тогтоолын хэрэгжилтийг хангах зорилгоор Засгийн газрын гишүүд, агентлагийн дарга нар, Дорнод, Дорноговь, Өмнөговь, Сүхбаатар, Сэлэнгэ, Ховд аймгийн Засаг дарга нарт хилийн боомтын халдвар хамгааллын дэглэмийг эрчимжүүлэх, хилийн хяналтыг сайжруулж, тандалт судалгааг хийх гэсэн хоёр чиглэлд үүрэг чиглэл өгсөн байна.

Нэг: Хилийн боомтын халдвар хамгааллын дэглэмийг эрчимжүүлэх:

1.1 “Хилийн авто замын боомтоор улс хоорондын ачаа тээвэрлэлтийг зохион байгуулах түр журам”-н дагуу тусгаарлалтын бүс байгуулж, халдвар хамгааллын дэглэмийг сахиулах, хэрэгжилтэд хяналт тавьж ажиллах;

1.2. Хилийн хяналтыг сайжруулж, тандалт судалгааг эрчимжүүлэх;

1.3. БНХАУ-аас импортолж буй түргэн гэмтэх, муудах бараа, бүтээгдэхүүнээс бусад ачаа барааг зөвхөн төмөр замаар тээвэрлэх, БНХАУ-ын Эрээн өртөөнд автомашинаас төмөр зам руу шилжүүлэн ачих арга хэмжээ авахыг Хятадын талтай хэлэлцэн шийдвэрлэх;

1.4. Экспортын ашигт малтмалын улс хоорондын тээвэрлэлт хийдэг аж ахуйн нэгжийн удирдлагуудын дотоодод тавих хяналтыг чангатгах, тээврийн хэрэгсэл, ачаа тээшийг ариутгаж, халдваргүйжүүлэх үйл ажиллагааг шаардлага хангасан нөхцөлд стандартын дагуу хийх;

1.5. Гашуунсухайт, Шивээхүрэн, Замын-Үүд боомтоор нүүрсний экспортын  тээвэрлэлт гүйцэтгэж буй жолооч нарыг халдвараас хамгаалах тусгаарлалтын дэглэмийг чангатгаж, “Коронавируст халдварын үед уул уурхайн бүтээгдэхүүний экспортын тээвэрлэлтийн үйл ажиллагааг онцгой нөхцөлд зохион байгуулах түр журам”-д заасан халдвараас сэргийлэх дэглэмийг чанд мөрдүүлж, дотоодын болон улс хоорондын тээвэрлэлтэд ажиллаж буй жолооч нарыг хооронд нь харьцуулахгүй байхад хяналт тавьж ажиллах;

1.6. Экспортын ашигт малтмалын улс хоорондын тээвэрлэлт хийдэг аж ахуйн нэгжийн удирдлагуудын дотоодод тавих хяналтыг чангатгах, тээврийн хэрэгсэл, ачаа тээшийг ариутгаж, халдваргүйжүүлэх үйл ажиллагааг шаардлага хангасан нөхцөлд явуулах;

1.7.Хилийн боомтуудад эмнэлгийн тусламж, үйлчилгээ үзүүлэх нөхцөлийг сайжруулан тээвэр хийж байгаа жолооч нарын эрүүл мэндэд хяналт тавих;

1.8. Хилийн авто замын боомтоор улс хоорондын ачаа тээвэрлэж байгаа тээврийн компаниуд жолооч нарыг амны хаалт, бээлий, халдваргүйжүүлэлтийн бодисоор хангах, халдвар хамгааллын дүрэм, журмыг мөрдүүлэх;

1.9. Жолооч нарыг коронавируст халдвар (Сovid-19)-ын оношлогооны шинжилгээг  түргэвчилсэн болон полимеразын гинжин урвалын /PCR/-ын аргаар Хятадын талд хийсэн шинжилгээтэй дүнтэй уялдуулан хийж, хяналтыг тогтмолжуулах;

Хоёр: Хилийн боомтод ажиллаж байгаа албан хаагчдын ажлын нөхцөлийг сайжруулах:

2.1. Хилийн боомтод ажиллаж байгаа хил, гааль, мэргэжлийн хяналт, эмнэлгийн ажилтнуудыг халдвар, хамгааллын нэг удаагийн хувцас хэрэгслээр бүрэн хангах, хувцас өмсч, тайлах дадлага сургалт тогтмол зохион байгуулах;

2.2.Эрсдэлтэй нөхцөлд ажиллаж байгаа ажилтнуудын эрүүл мэнд, ариутгал халдваргүйтгэлийн дэглэм, хөдөлмөрийн аюулгүй байдлыг чанд сахиулах, илүү цагаар ажилласны хөлс, урамшууллыг тооцож олгох зэргийг тусгасан байна. Эндээс татаж авна уу гэж Онцгой байдлын ерөнхий газраас мэдээллээ.