Эцэг эхийн хараа хяналтгүй, хайхрамжгүй үйлдлээс болж бяцхан үрс галд өртөж амь насаа алдсан тохиолдол цөөнгүй. Өнөөдөр /2020.11.06/ гэхэд л долоон настай эрэгтэй хүүхэд галд өртөж амь насаа алдах дөхжээ. Тодруулбал, СХД-ийн есдүгээр хорооны нутагт өрх нь шатаж байсан гэрт хүү харгалзах хүнгүй ганцаараа унтаж байжээ. Золоор хяналт шалтгалтаар ажиллаж байсан Онцгой байдлын алба хаагчид хүүг аварсан ба ноцож байсан галыг цаг алдалгүй унтраасан байна. Хэрэв Онцгой байдлын алба хаагчид хяналт шалгалт хийгээгүй, тухайн айлд очоогүй бол магадгүй дахин нэг хүүхэд нас барах байсныг үгүйсгэх аргагүй.

Дашрамд дурдахад, Онцгой байдлын газрын Гал түймрийн улсын хяналтын байцаагч, хошууч В.Мөнхдэлгэр, ахлах дэслэгч Х.Маамуу, "Тавантолгой түлш" ХХК-ийн хяналтын ажилтан Т.Алтанцэцэг нар  гал гарч байсан айлд 11:30 цагийн орчимд хяналт шалгалтаар очих үедээ ийнхүү хүүг аварчээ. Эргэн сануулахад, ердөө сар ч хүрэхгүй хэдхэн долоо хоногийн өмнө Сонгинхайрхан дүүрэгт 2-7 насны нэг айлын дөрвөн хүүхэд гэртэйгээ шатаж харамсалтайгаар амиа алдсан билээ.

Б.ЦЭЦЭГ