Засгийн газрын хуралдаанаас гаргасан шийдвэрүүдийг өнөөдөр (2020.11.04) танилцуулах үеэр Эрүүл мэндийн сайд сэтгүүлчдийн асуултад хариуллаа. Эрүүл мэндийн сайд Т.Мөнхсайхан "Баян-Өлгий аймагт ямар нэг байдлаар хилээр нэвтэрсэн иргэдээс COVID-19 илэрсэн тохиолдол байхгүй. Тэнд хил хаагаагүй. Тандалтын журмаар олон хүнд шинжилгээ хийсэн.

Герман улсад МИАТ-ийн төлөөлөгчид COVID-19-ийн халдвар авсан мэдээлэл бий. Эдгээр дөрвөн хүн эмнэлэгт хэвтээгүй, гэрт нь тусгаарласан. ХӨСҮТ-ийн эмч нартай холбогдож, заавар зөвлөгөө авч байна. Эндээс шаардлагатай эм, тариагаар хангах тал дээр ажиллаж байна. Мөн ХӨСҮТ-д өнгөрсөн шөнө элэгний хорт хавдартай 61 настай эмэгтэй нас барсан. Түүнээс COVID-19 халдвар илрээгүй" гэв.

Харин "МИАТ" компаниас Германд тусгаарлагдсан монгол иргэдийн талаар тодруулахад "Дөрвөн төлөөлөгчөөс халдвар илрээгүй. Хавьтагч гэдэг утгаар нь тусгаарлаад байгаа. Түргэвчилсэн оношлуураар шинжилгээ хийхэд бүгдийнх нь хариу сөрөг гарсан. Мэдээллийг албаны эх сурвалжаас тодруулж байна" гэлээ.

А.СҮРЭН