Алдарт Жэймс Бонд цувралын анхны гол дүрийг бүтээсэн байсан Шотландын жүжигчин Сэр Шон Коннери 90 насандаа таалал төгсчээ. Тэрээр сүүлийн үед биеийн байдал нь сайнгүй байсан бөгөөд Багамын арал дахь гэртээ амьсгал хураасан байна.

Амьдралынхаа 50 жилийг кино урлагт зориулсан тэрээр 1988 онд “The Untouchables” кинонд бүтээсэн дүрээрээ Оскарын шагнал хүртэж байжээ. Анх 1962 онд “Dr. No” кинонд Жэймс Бондын дүрийг бүтээснээсээ хойш нийт зургаан кинонд алдарт “007”-ийн дүрийг бүтээсэн юм.

• Dr No (1962)
• From Russia with Love (1963)
• Goldfinger (1964)
• Thunderball (1965)
• You Only Live Twice (1967)
• Diamonds are Forever (1971)
• Never Say Never Again (1983)

Харин түүний тоглосон анхны кино нь 1954 оны "Хаврын голт бор" байв. Жүжигчнээс гадна Шотландын тусгаар тогтнолыг тууштай дэмжигч байсан түүнд Британийн хатан хаан 2000 онд хүлэг баатрын хэргэм хүртээж байв. Түүнийг 20 дугаар зууны кино урлагийн домгуудын нэг гэж үздэг бөгөөд кино шүүмжлэгчид түүний бүтээсэн Жэймс Бондын дүрийг бүх цаг үеийн хамгийн сайн дүр болсон гэж дүгнэдэг.

Эх сурвалж: BBC