БНСУ дараа жилээс эхлэн Монгол руу экспортлодог автомашин, экскаватор тэргүүтэй 366 нэр төрлийн барааныхаа татварыг буулгана гэв. Монгол улс Ази, Номхон далайн худалдааны хэлэлцээрт нэгдэж, долоо дахь орон болсон учир ийнхүү хоёр улсын хоорондын худалдааны татвар харилцан буурч байгаа хэмээн өмнөд Солонгосын стратеги, сангийн яам өнөөдөр/2020.10.30/ мэдээлжээ.

Тухайлбал, өмнөд Солонгосоос Монгол улсад экспортлодог барилгын хүнд машин механизм, лаазласан хүнс зэрэг 366 нэр төрлийн барааний татвар дээд тал нь 24.2 хувиар буурч байгаа бол Монгол улсаас өмнөд Солонгост экспортлодог бүх барааны татвар 6.5 хувиар буурах гэнэ.

Ази, Номхон далайн худалдааны хэлэлцээрт нэгдсэн БНСУ, БНХАУ, Энэтхэг, Шри Ланка, Бангладеш, Лаос, Монгол улсууд ийнхүү хэлэлцээрээр хүлээсэн үүргийнхээ дагуу хоорондын худалдаа наймааны татварыг бууруулах ёстой байдаг ажээ. Тус хэлэлцээрт БНХАУ анх 2001 онд нэгдэж байсан бол Монгол улс ийнхүү 19 жилийн дараа буюу 2020 онд элссэн долоо дахь орон болжээ.

Эх сурвалж: YONHAP