Зарим улс орнуудад “Research in Motion” компанийн энэ долоо хоногт гаргасан шинэ смартфөүнийг хэрэглэхийг хориглосон байна. Blackberry смартфөүнийг Арабын Нэгдсэн Эмиратууд болон Саудын Арабид хэрэглэхийг хориглосон. Түүнчлэн Энэтхэг гэх мэт улсад тус смартфөүнийг хэрэглэхийг хориглох талаар ярилцаж байна. Үүний шалтгаан нь эдгээр засгийн газрууд мобайл и-мейлийг хянахыг хүсч байгаа авч “RIM”-ийн програм хангамж ийнхүү хөндлөнгөөс хяналт хийхийг зөвшөөрөхгүй байгаа юм. Хэрвээ “RIM” үүнийг зөв ашиглаж чадах юм бол энэ нь тэдний хувьд гэнэтийн маркетингийн маш том сурталчилгаа болж болох юм. Энэ нь тус компанийн бүтээгдэхүүн аюулгүй байдлын өндөр шалгуур хангаж байгааг нотолж байна. Тийм учраас АНУ-ын засгийн газар цэргийн албан хаагчиддаа BlackBerry загварын смартфөүн өгөхдөө итгэлтэй байдаг юм.

Энэ долоо хоногийн эхээр “RIM”-ийн хувьцааны ханш илүү өндөр үнээр арилжаалагдаж эхэлсэн. Гэвч мягмар гаригт тус компани “BlackBerry Torch” загвараа танилцуулсны дараа хувьцааных нь ханш буцаж унасан байна. Уг төхөөрөмж хөрөнгө оруулагчид, худалдан авагчдын хүслийг төдийлөн төрүүлж чадаагүй бололтой бөгөөд одоо байгаа байдал нь зах зээл дээрх стандарттай хөл нийлүүлээгүй байна. Тухайлбал урагшаа харсан камер байхгүй, “high-def” форматтай видео авч чаддаггүй хэмээн шүүмжилж байгаа бол “Boy Genius” уг утасны дэлгэцийг “инээд хүрэм” гэж тодорхойлсон байна. Уг утас “BlackBerry 6” үйлдлийн системтэй юм байна. Эдгээр нь гэхдээ анхны л үнэлгээнүүд тул “BlackBerry”-д утсаа “iPhone” юм уу “Android” үйлдлийн систем ашигладаг өөр бусад утаснуудаар солих хүсэлгүй хүмүүсийн сэтгэлийг татах өөр бусад зүйл байгаа нь эргэлзээгүй. Гэсэн хэдий ч “RIM”-тэй хэвээр үлдэх нь нэлээд хатуу сонголт байж магадгүй. Түүнчлэн “BlackBerry”-д зориулсан программууд сонголт багатай байгаа нь хэрэглэгчдэд нөлөөлж байна.

Т.Бадрах