Бразилын Ерөнхийлөгч Жаир Болсонаро иргэдэд авлигатай тэмцэгч мэтээр өөрийгөө харуулахыг зорьдог нэгэн. Гэтэл түүний ойрын хүрээний холбоотон авлигад авсан мөнгөө дотуур өмдөндөө нуусан байсныг цагдаа нар илрүүлжээ.

Тодруулбал, Болсонарогийн гол холбоотнуудын нэг, Рорайма мужаас сонгогдсон сенатор Чико Родригезийн гэрт цагдаа нар Лхагва гаригт /2020.10.14/ гүйцэтгэх ажиллагаа явуулсан байна. Энэ үеэр Родригез дотуур өмдөндөө 30 мянган реал буюу 5,250 ам доллар нуусан байсныг цагдаа нар нэгжлэг хийж, илрүүлжээ. Родригезийг цар тахалтай тэмцэх сангаас мөнгө завшсан хэмээн сэжиглэж дээрх гүйцэтгэх ажиллагааг явуулсан юм байна.

Зарим хэвлэл мэдээллийн хэрэгслээр Родригезийн дотуур өмднөөс илрүүлсэн мөнгө ялгадас болсон байсан гэж бичжээ. Харин өдгөө 69 настай сенатч энэ бол өөрийнх нь нэр хүндийг унагаах гэсэн зохиомол хэрэг, ийм хэрэг үйлдээгүй хэмээн мэдэгдсэн байна.

Эх сурвалж: The Guardian