АНУ-ын Батлан хамгаалах яамнаас энэ оны эхээр олон нийтэд ил болгосон Үл мэдэгдэх нисдэг биет (ҮМНБ)-ийн бичлэгүүдийг судлуулахаар тусгай ажлын хэлтэс томилсон гэдгийг Дональд Трамп үгүйсгэсэнгүй.

“Та яагаад Батлан хамгаалах яам ҮМНБ-ийг судлах ажлын хэсэг томилсныг тайлбарлаж чадах уу. ҮМНБ гэдэг зүйл байдаг гэсэн үг үү?” хэмээн "Фокс" агентлагийн сэтгүүлч Мариа Бартиромо Ерөнхийлөгчөөс асуужээ.

Харин Трамп “Би энэ асуудалд анхаарлаа хандуулах болно. Хоёр өдрийн өмнө сонссон. Би нэг зүйл хэлье. Өнөөдөр АНУ-д хүн төрөлхтний түүхэнд хэзээ ч байгаагүй хүчирхэг зэвсгүүд олны нүднээс далд бий. Бас би тэдгээрийг хэрэглэх шаардлага хэзээ ч гарахгүй байгаасай гэж хүсч байна. ОХУ, БНХАУ зэрэг улсууд үргэлж бидний бүтээсэн тэр зэвсгүүдэд атаархсаар ирсэн. Бидэнд 2.5 их наяд ам.долларын зэвсэг ч бий. Харин нөгөө асуултын хувьд бол би анхаарал хандуулах болно. Үнэндээ сонсоод хоёр л хонож байна” хэмээн хариулжээ.

Ийнхүү Трамп ҮМНБ байдаг эсэх асуултаас эвтэйхэн зайлсхийжээ. Гэхдээ Трамп 1947 онд ҮМНБ үзэгдсэн, унасан гэгддэг Рузвелл хотод “сонирхолтой зүйлс” харсан талаараа ярьж байсан удаатай гэнэ.

Эх сурвалж: INDEPENDENT