Өнгөрсөн жил манай улс улаан­­буудайнхаа хэрэгцээний 97 хувийг дотоодоосоо хангасан бол энэ жил 300 гаруй мянган тонныг хураахаар төлөвлөж,  улсын хэмжээнд 87 мянган тонн улаанбуудай агуулах сав бэлдээд байгаа гэнэ. Гэвч олон улсын зах зээл дээр нэг бушель улаанбуудайн үнэ зургаан ам.доллар 88 центэд хүрээд байгаа нь сүүлийн жи­лүүдэд энэ хэмжээнд хүрч байгаа­гүйгээрээ өсөөд байгаа аж. Манай оронд ч Сэлэнгэ, Архангай зэрэг айм­гуудын зарим уулархаг газруудаар цас ороод байгаа бөгөөд ойрын өдрүүдэд хэт халж, гэнэт  хүйтэрч байгаа нь ургац хураалтанд хэрхэн нөлөөлөх, гурилын үнийг цаашид тогтвортой байлгах талаар хэрхэн анхаарч байгааг  Хүнс, хөдөө аж  ахуйн  яамны Газар тариалангийн  бодлогын хэрэгжилтийг зохицуулах газрын дарга Л.Баяртулгаас тод­рууллаа.

-Олон газар ган гамшиг болж,  олон улсын зах зээл дээр улаанбуудайн үнэ хурдацтай өсч байгаа ч эх орондоо гурилын үнийг тогтвортой байлгах үндэслэл бий. Тариаланчиддаа хан­даж улаанбуудайндаа утаа тавих, хүйт­рэлтийн үед нормоор усалж, ургамлаа  кали сахар зэргээр бордох арга хэмжээ авах хэрэгтэйг сануулъя. Түүнчлэн техник хэрэгсэлдээ засвар, үйлчилгээг урьд­чилан хийж, зоорь агуулах зэргээ ариут­гаж ургацаа хүлээж авахад эртнээс бэлдэх учиртай. Бид дотооддоо тарьсан хүнсний ногоогоо ченжүүдийн гар дам­жин худалдаалахгүй байхад анхаарч ажил­лаж байна.  ”Намрын ногоон өд­рүүд”  өдөрлөгийг жил бүр зохион бай­гуулдаг. Өдөрлөгийн үеэр иргэд төмс, хүнсний ногоогоо тариаланчдын гар дээрээс шууд худалдан авах бо­ломжтой юм.  Угтаа ногооны үнэ, жи­шээл­бэл цэвэр монгол үрийн төмсийг тариа­ланчид маань 600 – 700 төгрөгөөр худалдаалдаг. Гэтэл ченжүүдийн гар дам­жаад дэлгүүр хоршоогоор дам­жи­хаар хүнсний ногооны үнэ их хэм­­жээгээр өсдөг. Үнийн хувьд бид зохи­цуулалт хийдэггүй. Мэргэжлийн Хяналт шинжилгээний албаныхан энэ тал дээр арга хэмжээ авах хэрэгтэй гэлээ.

Р.Нямжаргал