Энэ зуны хэт халалт манай орны газар тариаланд хэрхэн нөлөөлж байгаа талаар Хүнс, хөдөө аж ахуй, хөнгөн үйлдвэрийн яамнаас хэдхэн хоногийн өмнө тодруулахад  “Энэ жил 250 мянган га газарт улаан буудай тарьсан. Цаг агаарын хэт халалтаас болж газар тариаланд онцгой нөлөөлсөн зүйл байхгүй. Урьдчилан төлөвлөснөөр бол нэг га газраас 10-13 центнер хүнсний ногоо авах ба улаан буудайны хувьд 310-320 мянган тонн улаан буудай хурааж авахаар төлөвлөөд байгаа. Одоо­гоор улсын нөө­цөд зуун мянган тонн улаанбуудай байгаа. Мон­гол Улсын жилийн гурилны хэрэгцээ 240 мянган тонн байдаг боло­хоор гурил  ховор­доно, үнэ өснө гэж санаа зовохгүй байж болно” хэмээн хариулж байсан юм. Гэтэл хоёр хоногийн өмнөөс эхлэн хүнсний захуудад гу­ри­лын үнэ 80-100 төг­рөгөөр нэмэгджээ. Гурилын үнэ ямар учраас нэмэгдсэн, хойшдоо нэмэгдэх эсэх талаарх сурвалжлагыг Нарантуул захаас бэлтгэлээ.
Өчигдөр бага үдийн үед Нарантуулыг зорин очиход шөнө орсон борооны ус хаа сайгүй тогтоол үүсгэчээ.

“Гурилын үйлдвэрүүд болон импортын гурил нийлүүлж байгаа ченж нар уржигдар  өг­лөө ирэхдээ л үнээ нэм­чих­сэн байсан. Тэд нараас үнэтэй авсан гурилаа  хуучин үнээр нь зарвал бидэнд  ашиггүй боло­хоор аргагүйн эрхэнд  үнээ нэмсэн” гэсэн тайл­барыг сонссон юм.

Өчигдрийн байдлаар Нарантуул зах дээр “Алтан тариа”-ны дээд гурил нэг килограмм нь 800 төгрөг, нэгдүгээр гурил 650-700 төгрөг,  Оросын  дээд гурил 800 төгрөг, нэгдүгээр гурил 700, “Улаанбаатар”-ын  дээд гурил 700 төгрөг, нэгдүгээр гурил 650 төгрөгөөр зарагдаж байлаа. Гурилынхаа үнийг юуны учир гэнэт нэмсэн талаар үндэсний үйлд­вэрлэгч нараас тодруулахад “Дэл­хийн улс орнуудад ган нүүрлэж, үүнийг дагаад ургацын хэмжээ буурах төлөвтэй байна. Эндээс шалтгаалж улаанбуудайн үнэ өсөх болсон. Тиймээс манай ком­пани гурилын үнийг 70 төгрөгөөр нэмж байгаа” гэв.
Гурилын үйлдвэрүүд үнээ нэмснийг далимдуулж наймаачид шат дамжлага бүртээ тав, арван төгрөг нэмсээр ойролцоогоор 0,4 дахин өндөр үнээр  хэрэглэгчдийн гар дээр очиж байна. Энэ бол зөвхөн нийслэлд байгаа байдал. Орон нутагт хэчнээн  төгрөгөөр нэмж борлуулж байгааг тааварлахад бэрх байна.

 Б.Өсөхбаяр