Коронавирусийг оношлох хямд, хурдан, үр дүнтэй арга гэгдэж буй нэгэн сонирхолтой аргыг Финландын Хелсинки нисэх буудал хэрэгжүүлж эхэлжээ.

Эхний ээлжинд туршилтын журмаар төрийн хөрөнгө оруулалтаар тусгайлан бэлтгэсэн дөрвөн нохойг ажиллуулж эхэлсэн байна. Мэргэжилтнүүдийн үзэж буйгаар ноход коронавирусийн онцгой үнэрийг 10 секундэд амжин ялгаж чаддаг тул нэг хүнийг оношлох нийт хугацаа нь минут ч хүрэхгүй байх боломжтой аж.

Хелсинки нисэх буудлын ажилчид үйлчлүүлж буй хүмүүсийн арьсыг арчиж, арчсан сальфеткыг тус тусдаа савуудад хийх юм байна. Түүний дараа ноход сальфеткуудыг үнэртэж үзээд, коронавирус үнэртсэн сальфетканы хажууд хэвтэх, савраараа заах, хуцах зэргээр дохио өгөх аж. Түүний дараа нохойны өвчтэй хэмээн оношилсон хүнийг дахин нарийн шинжилгээнд хамруулахаар юм байна.

Үүнээс өмнө нохойгоор хорт хавдар, чихрийн шижин зэрэг өвчнүүдийг оношлуулах туршилтууд амжилттай болж, зарим эмнэлгийн үйл ажиллагаанд нэвтэрч эхэлсэн билээ.

Эх сурвалж: UNILAD