Дэлхийн өндөр хөгжилтэй, чинээлэг улс орнууд дуусах шатандаа орж буй коронавирусийн эсрэг вакцины талаас илүү хувийг худалдан авахаар урьдчилан захиалжээ.

Одоогоор вакцины туршилт нь дуусах шатандаа орсон таван компани, лаборатори байгаа ба эдгээр компаниуд нийлээд эхний 5,9 тэрбум тун вакцин нийлүүлэх боломжтой юм. Энэ нь ойролцоогоор гурван тэрбум хүн буюу дэлхийн нийт хүн амын бараг хоёрны нэгд хүрэлцэх хэмжээ гэсэн үг.

Дэлхийн хүн амын 13 хувийг бүрдүүлдэг АНУ, Их Британи, Австрали, Япон, Швейцарь, Израил, ЕХ зэрэг улсууд вакцины нөөцийн 51 хувийг авахаар урьдчилан тохиролцоод байгаа бол үлдсэн хувийг нь Энэтхэг, Хятад, Бангладеш, Бразил, Мексик тэргүүтэй улс орнууд авахаар төлөвлөжээ.

Дээрх тооцооллыг дэлхийн ядуурлыг бууруулах зорилгоор байгуулагдсан “Oxfam” олон улсын байгууллагын АНУ дахь салбараас гаргасан байна. Тус байгууллага нь дэлхийн баян чинээлэг улс орнууд хөрөнгө мөнгөөр түрий барьж, аминчхан үзэл гаргах ёсгүй, цар тахлын эсрэг вакциныг дэлхий нийтээрээ жигд хүртэх ёстой гэж үзэж байгаа аж.

Эх сурвалж: AFP