Сугар гаригийн агаар мандлаас амьд организм байж болзошгүй шинж тэмдэг илрүүлсэн тухай барууны эрдэмтэд өчигдөр (2020.09.15) зарласан билээ. Хавай болон Чилийн Атакамын цөлд орших телескопууд дээр цуглуулсан мэдээллээр тус гаригийн агаар мандлаас амьд организм задрахад үүсдэг фосфин хэмээх хий илэрсэн юм. Сугар гаригийн гадаргуу дээр цельсийн 470 градус хүрч халдаг, амьд организм оршин тогтнох бараг боломжгүй аж.

Уг мэдээллийн дараа АНУ-ын Сансар судлалын агентлаг NASA-ын захирал Жим Брайденштэйн Сугар гаригийн судалгаанд анхаарал хандуулахаа мэдэгджээ. Гэтэл үүний хариуд ОХУ-ын Сансар судлалын байгууллага “Роскосмос”-ын захирал Сугар гаригийг Орсоын гариг хэмээн мэдэгдээд, тус гариг руу хөлөг илгээх төлөвлөгөөтэй байгаа тухайгаа зарласан байна.

Тэрбээр 2021-2030 онд Оросын засгийн газрын сансар судлалын төлөвлөгөөнд Сугар гаригт хөлөг илгээхээр тусгагдсан хэмээн мэдэгджээ. Учир нь энэ гариг дээр дэлхийн улс орнуудаас хөлгөө буулгасан цор ганц улс нь ОХУ юм. ЗХУ 1970 онд “Венера 7” станцаа Сугар гариг дээр амжилттай газардуулсан ба уг үйл явдал хүн төрөлхтөн анх удаа харь гариг дээр буусан тохиолдол болж байв.

Эх сурвалж: RT