Япон улсын Ерөнхий сайд Абэ Шинзо эрүүл мэндийн шалтгаанаар ажил үүргээ гүйцэтгэх боломжгүй болсноо мэдэгдэж, албан тушаалаасаа өөрийн хүсэлтээр огцорч буйгаа өнгөрсөн сард зарласан. Ингээд 2021 онд бүрэн эрхийнх нь хугацаа дуусах байсан Абэ огцрох болсноор Япон улсын эрх баригч Либерал ардчилсан нам дахин шинэ даргаа сонгох сонгууль явуулах шаардлагатай болсон юм. Намын шинэ даргыг сонгох сонгууль өчигдөр /2020.09.14/ амжилттай болж, Абэ Шинзогийн баруун гар гэгддэг Сайд нарын танхимын дарга Сүга Ёшихидэ намын даргааг сонгогдлоо. Сүгагаас гадна Гадаад хэргийн сайд асан Кишида Фумио, Дотоод хэргийн сайд асан Ишиба Шигерү нар өрсөлдсөн ч ажиглагчид Сүгаг сонгогдоно гэдэгт итгэлтэй байв. Санал хураалтын үр дүнг харвал Сүга Ёшихидэ 377, Ишиба Шигэрү 68, Кишида Фүмио 89 санал авчээ. Ингэснээр тэр Япон улсын Ерөнхий сайд болох нь тодорхой болж байна.

Ерөнхий сайдыг энэ сарын 16-нд парламентын санал хураалтаар тодруулах бөгөөд Либерал ардчилсан нам парламентын олонх тул Сүга шинэ Ерөнхий сайд болох нь мэдээж хэрэг. Тэрбээр Абэ Шинзогийн эрх барих хугацаа дуустал Ерөнхий сайдын албан тушаал хаших бөгөөд 2021 оны есдүгээр сард болох сонгуулиар дахин Ерөнхий сайдын төлөө өрсөлдөж болох юм.

Чадварлаг, ард түмэн болон дэлхий нийтэд хүлээн зөвшөөрөгдсөн удирдагч Абэ Шинзогийн үйл хэргийг хэрхэн залгамжилж, дэлхийн гурав дахь том эдийн засагтай Япон улсыг хэрхэн авч явах бол гэх олон нийтийн хүлээлт бас сорилт  Сүгагийн өмнө ирээд байна.

ЭДИЙН ЗАСАГ-АБЭНОМИКСООС СҮГАНОМИКС РУУ

Олон жилийн турш Абэ Шинзогийн ойрын хүрээнд ажилласан Сүга “Абеномикс” хэмээн нэрлэгддэг одоогийн мөнгөний бодлого, засгийн газрын төсвийн зарцуулалт, бүтцийн шинэчлэлийг үргэлжлүүлнэ гэдгээ сонгуулийн өмнө хэлж байв. Тэрбээр цар тахлаас үүдэн дордоод буй эдийн засгийг дэмжих зорилгоор засгийн газрын гаргаж буй бондын хэмжээнд хязгаар гэж байхгүй хэмээн мэдэгдээд эдийн засгийн уналттай тэмцэхийн тулд дахин гурав дахь нэмэлт багцийг гаргахаа мэдэгдсэн.

"Бид эдийн засгийн өсөлттэй байж л төсвийн шинэчлэлийг хийж чадна" гэж Сүга хэлэв. Мөн тэр ажлын байрыг хамгаалахын тулд Төв банкны мөнгөний бодлогыг зөөлрүүлэх нэмэлт арга хэмжээ авахад бэлэн байгаагаа илэрхийлэв.

Түүнчлэн Сүга татварыг 10 хувийг бууруулахыг эсэргүүцэж байгаа юм. Зарим хууль тогтоогчид айл өрхөд цар тахлаас үүдсэн санхүүгийн ачааллыг бууруулахын тулд татварыг бууруулах санал гаргаад байгаа юм. Японы хойд нутгаас гаралтай тариачны хүү Сүга бүс нутгийн эдийн засгийг сэргээх ажлыг өөрийн тэргүүлэх чиглэлийн нэг гэж үздэг.

ШИНЭЧЛЭЛ

Шинэчлэлийн хүчтэй дэмжигч Сүга бүс нутгийн банкуудыг нэгтгэх, Абэгийн хийхээр төлөвлөж байсан гар утасны оператор компаниудийн төлбөрийг бууруулах зэрэг ажлуудыг дэмжин ажиллана гэдгээ мэдэгдсэн. Тэрбээр засгийн газрын дижитал стратегийг нэг дээвэр дор сурталчлах агентлаг байгуулахыг зорьж байгаа бөгөөд эрүүл мэндийн яаманд мөн  хийж болох шинэчлэлийг судалж үзнэ гэдгээ саяхны нэгэн хэвлэлд өгсөн ярилцлагадаа дурджээ.

"Би Либерал ардчилсан намын дарга болбол босоо сегментчилсэн засаг захиргааны системийг нурааж, хувийн ашиг сонирхлоосоо салж, шинэчлэлийг үргэлжлүүлэхийн тулд чадах бүхнээ хийх болно" гэж өнгөрсөн долоо хоногт ярьсан байна.

Үүнээс гадна хувийн компаниудад эмэгтэйчүүдийн эзлэх хувь хэмжээш нэмэгдүүлэх, эмэгтэйчүүдийн нийгэмд эзлэх байр суурийг нэмэгдүүлэх зохицуулалтыг хийх, нөхөн үржихүйн эмчилгээг даатгалд хамруулах зэрэг нарийн асуудлууд дээр ч санаа тавьж ажиллахаа амлаад байгаа юм.

ДИПЛОМАТ ХАРИЛЦАА, АЮУЛГҮЙ БАЙДАЛ

Сүга АНУ-тай харилцах харилцааг Япон улсын дипломат харилцаа, аюулгүй байдлын гол тулгуур гэж үздэг бөгөөд Хятад зэрэг хөрш орнуудтайгаа тогтвортой харилцаа тогтоохыг эрмэлздэг. Тэрбээр Хойд Солонгост хулгайлагдсан Япон иргэдийн асуудлыг шийдвэрлэхийн тулд урьдчилсан болзолгүйгээр Хойд Солонгосын удирдагч Ким Жон Унтай уулзахад бэлэн байгаагаа мэдэгдэж байв. Тэрбээр АНУ-ын жишгээр боловсруулсан пацифист үндсэн хуулийг шинэчлэхийг эрмэлздэг бөгөөд энэ нь Абэгийн эрхэм зорилгуудын нэг байв. Абэ Шинзогийн хувьд дэлхийн том гүрнүүдийн удирдагч нартай найрсаг дотно харилцаатай байж, Япон улсын гадаад харилцааны түвшинд олон жилийн турш тогтвортой байлгаж чадсан удирдагч. Харин Сүгагийн хувьд Абэгийн энэхүү том орон зай үгүйлэгдэж магадгүй юм.

КОРОНАВИРУС БА БУСАД

Сүга коронавирусийн оношилгооны цар хүрээг нэмэгдүүлж, ирэх оны дунд үе гэхэд Японы нийт хүн амд вакцин хийлгэх зорилготой байгаа гэдгээ хэлсэн.

Тэрээр орон нутгийн эдийн засгийн гол тулгуур болох аялал жуулчлалыг хүчтэй сурталчлагч бөгөөд саяхан “Ройтерс” агентлагт өгсөн ярилцлагадаа эдийн засгийг дахин нээхийн ач холбогдлын талаар ярьжээ.

Ярилцлагадаа тэрбээр Япон улс ирэх жил цар тахлаас болж нэг жилээр хойшлоод буй олимпийн наадмыг зохион байгуулахын тулд "шаардлагатай бүх зүйлийг" хийх болно гэдгийг онцолсон. Тэрбээр коронавирусийн тархалтаас сайтар урьдчилан сэргийлж, ээлжит бус сонгуулийг заавал зохион байгуулах ёстой гэдгийг мөн дурдсан байна.

Эх сурвалж: REUTERS