Энэ оны найман сарын байдлаар гэмт хэргийн улмаас 782 хүүхэд хохирчээ. Тэдний 82 нь бусдын гарт амь насаа алдсан бол 290 нь гэмтсэн байна. Хэдийгээр өмнөх оны мөн үетэй харьцуулахад эл үзүүлэлт  35 хувиар буурсан гэх боловч хүүхэд хүчирхийллийн “золиос” болж буйг харуулж буй. Үүний цаана хэчнээн хүүхэд цоочтой хаалганы цаана хүчирхийлэлд өртөж байгааг хэлж мэдэхгүй.

Цагдаагийн байгууллагад бүртгэгдсэн мэдээллээр Зөрчлийн тухай хуулиар 3000 иргэнийг баривчилж, Эрүүгийн хуульд заасны дагуу 200 орчим гэмт хэргийг цагдаагийн байгууллага шалгаж, прокурорт шилжүүлжээ. ЦЕГ-ын Хүүхдийг гэмт хэргээс урьдчилан сэргийлэх тасгийн дарга, цагдаагийн хошууч Д.Будзааны хэлснээр сүүлийн гурван жилд бэлгийн хүчирхийлэл ихсэх хандлагатай байгаа аж. Мөн ахуйн хүрээнд гэр бүлийн хамаарал бүхий хүмүүс хүүхдийн эсрэг гэмт хэрэг үйлдэж байгаа нь тогтоогджээ. Тэрбээр  “Хүүхдийн хүчирхийллийг ихэвчлэн хойд эцэг эх нь үйлдсэн байдаг. Гэхдээ хүүхдүүдээ сайн өсгөөд явж байгаа хүмүүс байгаа. Сүүлийн гурван жилий нбайдлаар 5043 хүүхэд хүчирхийлэлд өртсөн гэсэн тоо баримт бий. Тэдний 1000 орчим нь гэр бүлийн хүчирхийллийн хохирогч болсон. Залуу хосууд үүргээ ухамсарлаагүй гэр бүл төлөвлөснөөс болж салдаг. Дахин гэр бүл зохиоход хүүхэд анхны хохирогч болж байна. Энэ тохиолдолд бага насны хүүхдүүд хаана хандахаа мэддэггүй тул цагдаагийн байгууллагад мэдээлэл ирдэггүй” гэв.

Б.ЦЭЦЭГ