Унгарын мэргэжлийн хөлбөмбөгийн хоёрдугаар лигийн Активал Чаквар багт хүчин зүтгэж буй Г.Ганбаяр Европа лигийн урьдчилсан шатны тоглолтонд оролцохоор Швед улсыг зорьжээ. Тодруулбал, өдгөө 19 настай Сэлэнгийн унаган хүү тэрбээр Пушкаш Академийн үндсэн бүрэлдэхүүнд багтаж, Шведийн Хаммарбю багийн эсрэг тоглохоор болжээ.

Г.Ганбаярын хүчин зүтгэж буй Активал Чаквар баг нь Пушкаш академийн харъяа хоёрдугаар лигийн баг бөгөөд энэ сарын эхээр Г.Ганбаяр тус академийн залуучуудын багаас дэвшиж Активал Чаквар багт тоглох болсон юм.

Европа лиг бол УЕФА буюу Европын хөлбөмбөгийн холбооноос тивийнхээ мэргэжлийн клубуудын дунд зохион байгуулдаг хоёрдахь том тэмцээн юм. Та бүхний сайн мэдэх Интер Милан, Манчестер Юнайтед, Арсенал, Аяакс, Рома, ЦСКА Москва зэрэг том багууд энэ жилийн Европа лигт оролцсон.

Европа лигт түрүүлсэн баг дараа жил нь УЕФА Аваргуудын лигт хэсгийн шатнаас өрсөлдөх эрхтэй болдог.

Г.Ганбаярын хувьд 2016 онд Монголын хөлбөмбөгийн холбоо Унгар улсын мэргэжлийн хөлбөмбөгийн Пушкаш академитай үзэглэсэн хамтын ажиллагааны хүрээнд тус академид суралцаж, мэргэжлийн гэрээ үзэглэсэн юм. Түүний хувьд өнгөрөгч Даваа гаригт Активал Чаквар багийн төлөө анхныхаа гоолыг оруулж, Пушкаш Академийн үндсэн багийн хараанд өртжээ.