Унгарын хөлбөмбөгийн хоёрдугаар лигийн Активал Чаквар багт Монгол улсын үндэсний шигшээ багийн тамирчин Г.Ганбаяр хүчин зүтгэж байгаа талаар бид өмнө нь та бүхэндээ мэдээлж байсан билээ. Тэгвэл өнөөдөр/2020.08.24/ явагдсан тус лигийн тавдугаар тойргийн хүрээнд Активал Чаквар баг Капошвар багийн талбайд зочлон тоглож 2:2 гэсэн харьцаатай тэнцсэн байна. Энэхүү тоглолтын нэгдүгээр үеийн 40’ дэх минутанд Г.Ганбаяр гоол оруулан, Унгар хөлбөмбөгийн мэргэжлийн лигт гоол оруулсан анхны Монгол хөлбөмбөгчин боллоо.

Өдгөө 19 настай Г.Ганбаяр өнгөрөгч наймдугаар сарын 03-ны өдөр улирлын нээлтийн тоглолтонд сэлгээгээр талбайд гарч, Унгарын хоёрдугаар лигт шинэ багийнхаа төлөө дебют тоглолтоо хийсэн.

Монголын хөлбөмбөгийн холбоо Унгар улсын мэргэжлийн хөлбөмбөгийн Пушкаш академитай үзэглэсэн хамтын ажиллагааны хүрээнд 2016 онд дөрвөн залуу тоглогчийг тус академид суралцуулахаар явуулсан. Нэг жилийн хугацаанд бэлтгэл сургуулилт хийсний эцэст тэднээс Г.Ганбаяр мэргэжлийн гэрээ байгуулан тус академийн залуучуудын багт үргэлжлүүлэн тоглохоор болсон юм.

Одоогийн байдлаар Активал Чаквар баг хоёр оноотой лигтээ 20-р байранд бичигдэж байна. Нийт 38 тойрог явагдах тус лигийн дөнгөж эхний таван тойрог өндөрлөжээ.