ОХУ-ын холбооны аюулгүй байдлын алба буюу ФСБ долоон орос иргэнийг зүүн Украины Донбасс зэвсэгт босогчдын удирдагчдын нэгийг хулгайлахыг завдсан хэмээн сэжиглэж, баривчилжээ. Агентлагийн мэдээлж буйгаар сэжигтнүүд ажлаа бүтээгээд Киевээс мөнгөн шагнал авахаар тохиролцсон байж.

ОХУ-ын мөрдөн байцаах хорооны мэдээлж буйгаар долдугаар сард Украины КГБ-ийн залгамж халааг авсан СБУ-ын нэрийн өмнөөс ажиллаж буй бүлэг этгээдүүд үл хөдлөх хөрөнгө авахаар сонирхож буй хүмүүсийн дүр эсгэн Москва хотын ойролцоо тосгонд нэрийг нь нууцалсан хохирогчийг аваачин цахилгаанд цохиулж эрүүдэн шүүсэн байна. Хэрэгт холбогдсон долоон сэжигтэн хохирогч болох ОХУ-ын иргэнийг Украинд аваачихаар төлөвлөж байсан ч хохирогч тэдний гараас зугтаж чаджээ.

ОХУ-ын эрх баригчид Украины СБУ-д ажилладаг Андрей Байдала, Игор Мишченко нар ОХУ-ын мафид Донбасс зэвсэгт бүлэглэлийн удирдагчийг хулгайлах захиалга өгч, 200 мянган ам.доллар амлан, 50 мянгыг нь урьдчилгаа болгон өгсөн хэмээн мэдээлж байгаа юм. ФСБ-ын хэвлэлийн төлөөлөгч “ФСБ Украины онцгой албаны зохион байгуулсан хууль бус ажиллагааг илрүүлж, цаг алдалгүй дарж чадлаа. Хэргийн хохирогч нь иргэний дайны үед Украины армийн эсрэг том байр суурь олж авсан нэгэн юм” хэмээн мэдээлжээ.

ФСБ-ийн үзэж буйгаар Байдала СБУ-ын бие даасан ажил олгогч төдийгүй Украины тагнуулын хороотой нягт холбоотой гэнэ. Өөрсдийгөө Донецкийн бүгд найрамдах улс хэмээн зарласан улсад Байдала Терорист халдлага, хуучин удирдагч Александер Захарченког хороосон гэх мэт хэд хэдэн гэмт хэрэгт холбогддог юм байна.

Донбассын дайн 2014 оны дөрөвдүгээр сард эхэлсэн бөгөөд одоогийн байдлаар босогчид Украины багагүй хэсгийг эзэлж, албан бусаар бүгд найрамдах Донецк болон Луганск гэх хоёр улсыг Москвагийн дэмжлэгтэйгээр байгуулаад байгаа юм.

Эх сурвалж: RT.COM