Өмнөд Солонгост сүүлийн хоёр өдөр дараалан хоногт шинээр бүртгэгдэж буй "Сovid-19" халдварын тохиолдлын тоо 100 даваад байна. Тус улсад өнгөрсөн Баасан гариг (2020.08.14)-т коронавирусийн 103 шинэ тохиолдол бүртгэгдсэн бол өнөөдөр (2020.08.15) 166 шинэ тохиолдол бүртгэгдэж, огцом нэмэгджээ. Энэ нь гуравдугаар сарын 31-нээс хойш нэг өдөрт илэрсэн хамгийн олон тохиолдол болсон байна.

Шинээр бүртгэгдэж буй халдварын тохиолдлын ихэнх нь Сөүл орчмын сүм, ажлын байр, асрамжийн газруудаас гаралтай байгаа нь анхаарал татаж бУй юм. Иймд байдал цаашид хүндэрсээр байвал Сөүл орчмын бүс нутагт онц байдлын зэргийг хоёрдугаар түвшин рүү шилжүүлнэ хэмээн тус улсын ерөнхий сайд Чун Сэ Кюн мэдэгджээ.

Одоо тус улсад онц байдлын нэгдүгээр түвшний дэглэм үйлчилж байгаа ба амны хаалт зүүх, гар ариутгах зэрэг бусад халдвараас сэргийлэх арга хэмжээ авсан тохиолдолд олон нийтийн арга хэмжээ зохион байгуулахыг зөвшөөрч байна. Харин онц байдлын түвшинг нэмэгдүүлбэл олон нийтийн арга хэмжээ зохион байгуулахыг хориглох, спорт, урлаг, үзвэр үйлчилгээний байгууламжуудыг хаах юм.

Тус улсын эрүүл мэндийн байгууллагаас мэдээлж буйгаар иргэд амны хаалт зүүж, гараа ариутгаж заншсанаар бусад халдварт өвчний тархалт огцом буурчээ. Тухайлбал, тус улсад улаан бурхан өвчний тархалт цар тахал гарахаас өмнөх жилийн энэ үетэй харьцуулахад 97 хувиар, ханиад томуугийн гаралт 62 хувиар буурсан байна.

Эх сурвалж: BLOOMBERG